logo
२०७७ कार्तिक १२ बुधवार

झापामा आइतबारदेखि कोजाग्रत पूर्णिमासम्म निषेधाज्ञा

प्रदेश |


2020-10-18-24981


लीलााराज झापाली
बिर्तामोड, कार्तिक २ गते । जिल्ला प्रशासन कार्यालय झापाले आज (आइतबार)देखि कोजाग्रत पूर्णिमासम्म बेलुकी ८ देखि बिहान ५ बजेसम्म निषेधाज्ञा जारी गरेको छ ।
दशैं शुरु भएको र जिल्लामा कोरोनाको संक्रमण तीब्ररुपमा फैलिँदै गएको निष्कर्षसहित सो निर्णय गरिएको जिल्ला प्रशासन कार्यालयका प्रमुख श्रवणकुमार तिम्सिनाले बताउनुभएको छ ।
प्रमुख जिल्ला अधिकारी तिमिल्सिनाद्वारा जारी सूचनामा अत्यावश्यक काममा बाहेक सो समयभित्र हिंडडुल, सवारी साधनको आवतजावत, पसल व्यवसाय आदि नगर्न रोक लगाइएको जनाइएको छ ।

त्यसैगरी दशैंलाई लक्षित गर्दै प्रशासनले अबैध मदिरा उत्पादन तथा विक्री वितरण नगर्न, मदिरा सेवन गरेर सवारी नचलाउन, पटाका तथा आतिशवाजी वस्तुहरुको ओसारपसार नगर्न नगराउन, धार्मिक, सामाजिक तथा साँस्कृतिक सद्भाव बिथोल्ने किसिमका गतिबिधिहरु नगर्न, विभिन्न संघ संगठन तथा संस्थाहरुले गर्ने शुभकामना आदानप्रदान जस्ता मानिस जम्मा भएर गरिने कार्यक्रमहरु नगर्न , ध्वनी प्रदुषण हुने गरी ठूलो आवाजमा माइक नबजाउन पनि सूचित गरेको छ । धार्मिक शक्तिपिठहरुमा नित्य पूजाबाहेक भेला भएर भीडभाड मेला बजार आदि लगाउन पनि रोक लगाइएको छ । जिल्लास्तरीय कोरोना रोकथाम तथा नियन्त्रण समन्वय समितिको बैठकले सोसम्बन्धी निर्णय गरेको जनाइएको छ ।

यसैगरि इलाका प्रहरी कार्यालय सुरुङ्गाद्धारा चाड लक्षित सुरक्षाका लागि नागरिक प्रहरी साझेदारी गर्ने निर्णय गरिएको छ । सम्पन्न भेलाबाट यस क्षेत्रका सम्भावित दुव्यर्सनीका क्षेत्रहरु र होटल व्यावसायलाई मर्यादिन रुपमा सञ्चालनका लागि आग्रह गरिएको छ । भेलामा कनकाई नगरपालिका प्रमुख राजेन्द्रकुमार पोखरेल, इलाका प्रहरी कार्यालय सुरुङ्गाका इन्चार्ज प्रहरी नायव निरीक्षक पदमसुन्दर लिम्बु, राजनैतिक दलका प्रतिनिधि पत्रकार लगायातको सहभागिता थियो ।

यो समाचार पढेर तपाईलाई कस्तो लाग्यो?