गोकर्ण दयाल
बैतडी,जेठ १ गते । सरकारले बैतडी पठाएका तीन जना डाक्टर २२ दिन बसेर काठमाडौँ फर्किनुभएको छ । बैतडीमा दरबन्दीअनुसार एक जना पनि डाक्टर छैनन् ।
सुदूरपश्चिम प्रदेशका नौ जिल्लामा भारतबाट आएका २ हजार ६६८ जना क्वारेन्टाइनमा हुनुुहुन्छ । यसको आधा जनसंख्या बैतडीमा मात्र १३ सय ४५ जना क्वारेन्टाईनमा छन् तर, उहाँहरूको स्वास्थ्य परीक्षण गर्न अस्पतालमा किट छैन ।
सुदूरपश्चिम प्रदेश प्रदेशका नौ जिल्लाअन्तर्गत क्वारेन्टाइनमा बसेकाहरू बैतडीमा १३ सय ४५, अछाममा १०२, बझाङमा ५३२, बाजुरामा १०९, डडेल्धुरामा ८८, दार्चुलामा १००, डोटीमा ९, कैलालीमा २९८ र कञ्चनपुरमा ८५ जना क्वारेन्टाइनमा रहेका छन् ।
बैतडी अस्पतालमा दुई वर्षदेखि दरबन्दीका डाक्टर छैनन् । ८० हजार जनसङ्ख्या रहेको बैतडीको तल्लोस्वराड क्षेत्रको एक मात्र केशरपुर प्राथमिक स्वास्थ्य केन्द्रमा १८ वर्षदेखि डाक्टर आएका छैनन् ।
स्वास्थ्य संस्थामा जनरल सेवा दिने गरी सरकारले बैतडी पठाएका डाक्टरसमेत २२ दिन बसेर फर्केपछि बैतडीको स्वास्थ्य अवस्था दयनीय बन्नपुगेको छ ।
सङ्घीय सरकारले गत वैशाख पहिलो हप्ता सुरदूरपश्चिममा ३४ जना डाक्टरमध्ये बैतडी अस्पतालमा तीन जना डाक्टर पठाएको थियो ।
बैतडी खटाइएका डाक्टर विकास शहनी, डाक्टर विहन्त शाह र डाक्टर प्रकाश दर्जी बैतडी आईपुग्नु भएको थियो । डाक्टर विकास शहनी र विहन्त शाह दम रोग, मधुमेह, उच्च रक्तचापलगायत जनरल सेवातर्फ र डाक्टर प्रकाश दर्जी हड्डी रोगसम्बन्धी विशेषज्ञ हुनुहुन्थ्यो ।
लामो समयदेखि डाक्टरविहीन जिल्ला अस्पतालमा डाक्टर आईपुगेपछि बैतडीबासी खुसी बनेका थिए । बाइस दिनमै मै डाक्टर फर्केर गएपछि बैतडीबासी निराश बनेका छन् ।
याे पनि हेर्नुहाेस्...
‘बिन्ती छ सरकार, हामीलाई स्वदेश फर्काइदेऊ’
उहाँहरू तीनै जना २२ दिन बसेर असारमा परीक्षा भएकोले काठमाडौँ फर्किएको जिल्ला अस्पताल बैतडीका छात्रवृत्ति करारमा रहनुभएका निमित्त अस्पताल प्रमुख डाक्टर बसन्तराज जोशीले बताउनुभयो ।
यता भारतबाट आएर क्वारेन्टाइनमा बसेकाहरूको द्रुत परीक्षण गर्न किट सकिएपछि प्रदेश सरकारसँग किट माग गरिएको स्वास्थ्य कार्यालय, बैतडीका स्वास्थ्य प्रमुख योगेशप्रसाद भट्टले बताउनुभयो ।
प्रदेश सरकारले बैतडीमा ल्याब स्थापना र जिल्ला अस्पताल बैतडीमा भेन्टिलेटर जडान गर्ने निर्णय गरे पनि प्रक्रिया अघि बढ्नसकेको छैन ।
