logo
२०८० चैत्र १५ बिहीवार



फ्लोयडको स्मृतिमा अमेरिकामा देशभरि हजारौँको प्रदर्शन

अन्तर्राष्ट्रिय |


फ्लोयडको स्मृतिमा अमेरिकामा देशभरि हजारौँको प्रदर्शन


वासिङ्टन, जेठ २३ गते ।
प्रहरी हिरासतमा मारिएका अश्वेत अमेरिकीको स्मृतिमा देशभरि हजारौँले प्रदर्शन गरेका छन् । प्रहरीद्वारा हत्या गरिएका जर्ज फ्लोइडमाथि अन्याय भएको भन्दै प्रदर्शनकारीहरूले फ्लोइडलाई न्यायको माग गर्दै प्रदर्शन गरेका हुन् ।

उनीहरूले अमेरिकाका धेरै शहरहरूमा ‘प्ले कार्ड’सहित शान्तिपूर्ण प्रदर्शन गरेको विभिन्न सञ्चार माध्यमहरूले समाचार सम्प्रेषण गरेका छन् । गत मे २५ मा फ्लोइडको हत्या भएपछि देशभर भएका प्रदर्शनहरू हिंसात्मक बनेका थिए यद्यपि आन्दोलन पछिल्ला दिनहरू शान्तिपुर्ण रहेका छन् । फ्लोइडका परिवारजनले आन्दोलनलाई शान्तिपूर्ण गराउन आह्वान गरेपछि देशभरि आन्दोलन शान्तिपूर्ण भएको हो ।

त्यसअघि आन्दोलनका क्रममा दर्जनभन्दा बढीको मृत्यु भइसकेको छ भने करोडौँ अमेरिकी डलर बराबरको भौतिक क्षति भएको छ । अमेरिकाको मिनियापोलिसस्थित प्रहरी कार्यालयमा श्वेत प्रहरीले घाँटी च्यापेर ४६ बर्षीय फ्लोइडको हत्या गरेको आरोप लगाइएको छ ।

घाँटी च्यापेर हत्या गरेको भिडियो सार्वजनिक भएपछि आन्दोलन चर्किएको हो भने सरकारले छानविन प्रक्रिया पनि अगाडि बढाएको छ । प्रहरीले हत्या आरोपित प्रहरीलाई बर्खास्त गरेर नियन्त्रणमा लिई छानविन तथा कारबाही शुरु गरेको हो । प्रदर्शनकारीले अमेरिकाको प्रहरी र न्याय सेवामा व्यापक परिवर्तनको आवश्यकता रहेकोमा जोड दिँदै आएका छन् ।

न्युयोर्क, वासिङटन डिसी, सिकागो, लस एन्जलसलगायतका ठाउँमा प्रदर्शनकारीले गत एक हप्ताभन्दा लामो समयदेखि प्रदर्शन गर्दैआएका छन् । शुक्रबार लस एन्जलसमा प्रदर्शन गर्नेहरूले बाजा बजाउँदै नारा लगाएका थिए । आन्दोलनका क्रममा १० हजारभन्दा बढी प्रदर्शनकारी पक्राउ गरेका छन् भने हजारौँ घाइते भएका छन् ।

यो समाचार पढेर तपाईलाई कस्तो लाग्यो?