logo
२०८० चैत्र १६ शुक्रवार



बीबीसीको एक सय प्रभावशाली महिलाको सूचीमा नेपालकी सपना रोका मगर

समाज |


बीबीसीको एक सय प्रभावशाली महिलाको सूचीमा नेपालकी सपना रोका मगर


गोरखापत्र अनलाइन
काठमाडौं, मंसिर ९ गते । अन्तर्राष्ट्रिय समाचार संस्था बीबीसीको विश्वका एक सय प्रभावकारी तथा प्रेरणादायी महिलाको सूचीमा नेपालकी सपना रोका मगर पर्नुभएको छ । जीवन कठिन परिस्थिति र अशान्तमय बनेको अवस्थामा पनि अरुभन्दा फरक गरेर समाजमा परिवर्तन ल्याउने महिलालाई विश्वबाट खोज गरिन्छ र वार्षिक रुपमा त्यस्ता एक सय महिलाको सूची बीबीसीले सार्वजनिक गर्दै आएको छ ।
बीबीसीको उक्त सूचीमा फिनल्याण्डमा गठबन्धन सरकारको नेतृत्व गर्नुभएको सान मरिन सबैभन्दा शीर्ष स्थानमा हुनुहुन्छ । त्यसैगरी, अक्सफोर्ड विश्वविद्यालयमा कोरोनाभाइरस विरुद्धको खोप अनुसन्धान गर्ने सरह गिलबर्ट समेत उक्त सूचीमा हुनुहुन्छ । बीबीसीको उक्त सूचीमा एकजना महिलाको स्थान रिक्त राखिएको छ । बीबीसीको अनलाइन संस्करणले लेखेको छ, “असाधारण वर्षमा अरुलाई सहयोग गर्दागर्दै अनगन्ती महिलाले त्याग गरेको हुनसक्छ, श्रद्धाञ्जली स्वरुप एकजनाको नाममा एक स्थान रिक्त राखिएको छ । ”
तीन महिनासम्म घरवारविहीन बन्न पुगेकी सपनाले काठमाडौंको यात्रा गर्नुभयो । काठमाडौंको पशुपति आर्यघाटमा दाबी नगरिएको शव ब्यवस्थापन गर्ने एक संगठनमा उहाँ आबद्ध हुन पुग्नुभयो ।
कोरोना सङ्क्रमणबाट मृत्यु हुनेको शव नेपाली सेनाले ब्यवस्थापन गर्दै आएको छ । सपना आबद्ध संस्थाले सनाखत हुन नसकेको बेवारिसे शवलाई अस्पताल पुर्याएर पोष्टमार्टम गराउँछ । ३५ दिनसम्म कुनै ब्यक्तिले उक्त शवमाथि दाबी नगरेको अवस्थामा सपना आबद्ध संस्थाले धार्मिक परम्परा अनुसार सदगद् गर्दै आएको छ । दागबत्ती दिने कामदेखि प्राबिधिक काममा सपना प्रत्यक्ष संलग्न हुँदै आउनुभएको छ । सपनाले आफैं पनि सडकमा बेवारिशे जीवन ब्यतित गर्नुभएको छ । उहाँलाई सडकबाट उद्धार गरी सामाजिक सेवाका लागि प्रेरित गर्ने बिनयबाबु बस्नेतसँगै मिलेर उहाँले समाज सेवामा समर्पित हुन पुग्नुभयो । सपना र विनयले हालसम्म कम्तीमा तीन सयभन्दा बढी शवको धार्मिक परम्परा अनुसार अन्त्येष्टि गर्नुभएको छ ।
बीबीसी एक सय प्रभावशाली महिलाको सूचीमा परेपछि उहाँले आफ्नो सामाजिक सञ्जालमा सबैप्रति आभार ब्यक्त गर्नुभएको छ ।

उक्त सूचीमा आबद्ध हुनुअघि सपना रोका मगरले भन्नुभएको छ, “विश्वमा धेरै घरवारबिहीन भएर त्यागिएका ब्यक्ति छन् । सडक र गल्लीमा मृत्यु हुनेले समेत आफ्नो अन्तिम अधिकार पाउनुपर्छ, सामाजिक सेवाको रुपमा मात्र नभई मैले आफ्नो मन मस्तिष्कमा शान्तिको लागि उक्त काम गर्दै आएकी छु ।”

 

यो समाचार पढेर तपाईलाई कस्तो लाग्यो?