logo
२०७७ मंसिर १२ शुक्रवार

अमेरिकामा एकैदिनमा अहिलेसम्मकै धेरै सङ्क्रमित 

अन्तर्राष्ट्रिय |


2020-10-24-25360


   
इडाहो, कात्तिक ८ गते । अमेरिकामा कोरोनाभाइरसबाट दैनिक सङ्क्रमितको सङ्ख्या अहिलेसम्मकै धेरै देखिएको छ । लकडाउन खुकुलो हुदै गएको, चुनावी गतिविधि बढेको, भिडभाड धेरै हुन थालेको लगायतका कारणले सङ्क्रमितको संख्यामा बृद्धि भएको अधिकारीहरुले जनाएका छन् ।     
    
केही अस्पतालमा सङ्क्रमितहरुको संख्या अत्यधिक भएको र उनीहरुकोमा त्यो संख्या पनि अहिलेसम्मकै धेरै भएको जनाइएको छ । अमेरिकामा शुक्रवार ८३ हजार भन्दा बढीमा कोरोनाभाइरस सङ्क्रमण पुष्टि भएको तथ्याङ्क छ । तर मृत्यु दर भने राम्रो उपचारका कारण कम भएको बताइएको छ ।    
    
विभिन्न निकायले दिएको विवरण अनुसार अमेरिकामा कोरोनाभाइरसको महामारी शुरू भए यता ८५ लाख मानिस कोरोनाभाइरस सङ्क्रमित भएका छन् । यसअघि एकैदिनमा सवैभन्दा धेरै सङ्क्रमित गत जुलाई १७ मा भएका थिए । त्यो दिन ७६ हजार ८ सय ४२ रहेकोमा अहिले झण्डै ६ हजारले बढी भएको देखिएको छ ।    
    
त्यसैगरी साप्ताहिक विवरण हेर्दा पनि गत एक हप्तामा ४ लाख ४१ हजारभन्दा बढीमा सङ्क्रमित भएका छन् । यो सङ्ख्या पनि जुलाई यताको सबभन्दा धेरै भएको जनाइएको छ। तर मृत्यु भएकाहरुको सङ्ख्या भने गत अप्रिलको भन्दा कम नै छ । अप्रिलमा दैनिक दुई हजारको मृत्यु भएको थियो ।    
    
पछिल्ला केही दिनदेखि सङ्क्रमितको संख्यामा बृद्धि भएसँगै अस्पताल भर्ना हुनेहरुको संख्यामा पनि बृद्धि भएको छ । शुक्रवारको तथ्याङ्क अनुसार ४१ हजार ४८५ जनाकाे विभिन्न अस्पतालमा उपचार भइरहेको छ ।    
    
कतिपय देशमा पछिल्लो समयमा फेरि सङ्क्रमितको संख्या बढ्न थालेको पाइएको छ । विश्व स्वास्थ्य सङ्गठनले पनि अमेरिकासहितका कतिपय मुलुकमा कोरोनाभाइरसको सङ्क्रमण फैलिने क्रम अत्यन्त धेरै रहेको र ती क्षेत्रको अवस्था कठिन रहेको भन्दै चिन्ता व्यक्त गरेको छ ।    

यो समाचार पढेर तपाईलाई कस्तो लाग्यो?