अवैध भारतीय रुपियाँसहित एक जना पक्राउ

राममणि दाहाल

हेटौँडा, असार २६ गते। मकवानपुर प्रहरीले अवैध भारतीय रुपियाँसहित एक जनालाई पक्राउ गरेको छ। हेटौंडा उपमहानगरपालिका वडा नम्बर १५ रातोमाटेस्थित सडक खण्डमा सवारी साधन जाँच गर्ने क्रममा मंगलबार बिहान काठमाडौंबाट वीरगञ्जतर्फ जाँदै गरेको प्रदेश ३–००१ ख २५१६ नम्बरको बसबाट अवैध भारतीय रुपियाँ तीन लाख ७५ हजार फेला पारेको हो। 

बसमा सवार भारतको बेतिया जिल्ला बैरिया थाना मियापुर दवौली ७ का ४० वर्षीय रमेश साह गुप्ताले कम्मरमा कपडाले बेरी लुकाई ल्याएको अवैध रकम प्रहरीले नियन्त्रणमा लिएको हो। गुप्तालाई आवश्यक कारबाहीको लागि राजस्व अनुसन्धान कार्यालय बारा पथलैया पठाइएको छ। यस्तै प्रहरीले बिल साथमा नभएको केही सामानसमेत नियन्त्रणमा लिएको छ।