काठमाडाैं, असाेज ७ गते । प्रमख प्रतिपक्षी दल नेकपा (एमाले) को केन्द्रीय कमिटीको बैठक असोज ८ र ९ गते बस्दैछ । ललितपुरको च्यासलस्थित तुलसीलाल प्रतिष्ठानमा नेकपा (एमाले) को केन्द्रीय कमिटी बैठक बस्न लागेको एमाले पार्टी केन्द्रीय कार्यालय सचिव शेरबहादुर तामाङले जानकारी दिनुभयो ।
एमालेको पूर्व कार्यसूची अनुरुप असोज १५, १६ र १७ गते हुन गइरहेको विधान महाधिवेशनका लागि राजनीतिक प्रस्ताव, सांगठनिक प्रस्ताव र विधान संशोधनसम्बन्धि प्रस्तावमाथि एमाले स्थायी कमिटीको बैठकमा छलफल भइसकेको छ । यी मुख्य तीन प्रस्तावमाथि स्थायी कमिटी सदस्यहरुले राख्नुभएको सुझावसहितको मस्यौदा प्रतिवेदनमाथि केन्द्रीय कमिटीको बैठकमा छलफल हुने तामाङले बताउनुभयो । एमाले केन्द्रीय कमिटीको बैठकले यी प्रतिवेदनमाथि छलफल पश्चात् पारित पनि गर्ने तामाङले बताउनुभएको छ।
