logo
२०७८ कार्तिक ३ बुधवार



लोकसेवाले नयाँ पदपूर्ति र बढुवा प्रक्रिया अगाडि बढायाे

मुख्य समाचार |


लोकसेवाले  नयाँ पदपूर्ति र बढुवा प्रक्रिया अगाडि बढायाे


लक्ष्मीप्रसाद उपाध्याय

काठमाडौँ, असोज १ गते । लोकसेवा आयोगले कोभिड–१९ को महामारीका कारण राष्ट्रसेवक कर्मचारीको नयाँ पदपूर्ति र बढुवासम्बन्धी रोकिएका कामलाई धमाधम अगाडि बढाउन थालेको छ ।
आयोगले सरकारी सेवालाई थप प्रभावकारी बनाउन नयाँ पदको सिर्जना गरी पदपूर्ति गर्न र कर्मचारीको वृत्तिविकास गर्न हरेक वर्ष खुला तथा आन्तरिक प्रतिस्पर्धाबाट पदपूर्ति तथा बढुवाका प्रक्रिया गर्दै आएको छ ।
तर विगत दुई वर्षमा कोभिडको महामारीले गर्दा प्रकाशित भइसकेका पदका लागि परीक्षासमेत सञ्चालन हुन सकेका थिएनन् । त्यसले गर्दा नेपाल सरकारले माग गरेका पदको नयाँ पदपूर्ति पनि हुन सकिरहेको थिएन ।
कोभिडको प्रभाव कम भएसँगै विगतमा स्थगित भएका विभिन्न तहका परीक्षा सञ्चालन भइसकेका छन् भने पदपूर्ति र बढुवाको अन्तिम प्रतिफल पनि प्रकाशित हुने क्रम पनि जारी रहेको छ ।
आयोगका प्रवक्ता तोयानारायण सुवेदीका अनुसार आर्थिक वर्ष २०७६/७७ र २०७७/७८ गरी दुई वर्ष रोकिएका सबै पदका परीक्षा सञ्चालन भइसकेका छन् ।
ती दुई वर्षका सहसचिव तथा उपसचिव तहका कार्यक्षमता र जेष्ठताको बढुवाको परीक्षाफल प्रकाशित भई पदस्थापन पनि भइसकेको छ भने खुला तथा आन्तरिक प्रतिस्पर्धाका पदमा लिखित परीक्षा सञ्चालन भई परीक्षाफल प्रकाशित गर्ने तयारी भइरहेको छ ।
प्रवक्ता सुवेदीले भन्नुभयो, “सहसचिव र उपसचिव पदको परीक्षाफल प्रकाशित गर्ने अन्तिम चरणमा पुगेको छ तर शाखा अधिकृतदेखि तल्ला पदका विषयमा अदालतमा मुद्दा परिरहेकोले त्यसको टुङ्गो लागेपछि मात्र बाँकी काम अगाडि बढाइने भएका छन् ।”
कोभिडले प्रभावित पारेपछि विगत दुई वर्षको अवधिमा गर्न नसकिएका नयाँ पदपूर्ति तथा बढुवा प्रक्रियाको करिब चार हजार कर्मचारीको छनोट गर्ने काम आयोगले पछिल्ला दिनमा सम्पन्न गरिसकेको छ । प्रवक्ता सुवेदीका अनुसार कोभिडको प्रभाव कम हुने बित्तिकै आयोगको कार्यालयमा स्वास्थ्यका मापदण्ड पूरा गरेर भए पनि परीक्षा सञ्चालन गरेको छ ।

जसबाट आम राष्ट्रसेवकको वृत्तिविकासको कुरा अवरुद्ध भएको छैन ।आयोगले आर्थिक वर्ष २०७८/२०७९ को वार्षिक कार्यतालिका सार्वजनिक गरिसकेको छ ।
प्रवक्ता सुवेदीले आउँदो असोज महिनाको अन्तिम बुधबारबाट चैत महिनाको अन्तिम बुधबारसम्म विभिन्न सेवा तथा पदका लागि नयाँ पदपूर्ति तथा बढुवाको कार्यक्रम सञ्चालन गरिने बताउनुभयो ।
विगत दुई वर्षको अवधिमा आयोगले माग गरेको नयाँ पदपूर्तिका विषयमा अदालतको फैसला तथा सामान्य प्रशासन मन्त्रालयले टुङस्गो लगाएपछि काम थालनी गर्ने योजना आयोगले बनाएको छ । बाँकी रहेका सबै पदको पदपूर्ति तथा बढुवा प्रक्रियालाई यथाशक्य छिटो सम्पन्न गर्ने कार्यतालिका निर्माण गरेको जनाइएको छ ।

यो समाचार पढेर तपाईलाई कस्तो लाग्यो?