म्याग्दी, चैत २१ गते । सहरी विकास मन्त्रालयले चालु आर्थिक वर्ष २०८१/८२ मा करिब १७ करोडको लागतमा यातायात पूर्वाधार निर्माण सम्बन्धी १६ वटा योजना सञ्चालनमा ल्याएको छ । मन्त्रालय अन्तर्गतको स्थानीय पूर्वाधार विकास आयोजना पोखरा मार्फत् दुई झोलुङ्गे पुल, नौ वटा सडक र सघन सहरी तथा भवन निर्माण आयोजना बागलुङ मार्फत् तीन वटा सडक योजना विभिन्न निर्माण कम्पनीसँग १५ करोड १७ लाख २२ हजार छ सय ४६ मा ठेक्का सम्झौता गरी कार्यान्वयन गरिएको हो ।
चालु आर्थिक वर्षमा एक करोड ६० लाख बजेट विनियोजन भएको दुई वटा योजना ठेक्का प्रक्रियामा छन भने एक करोड १० लाख बजेटका दुई वटा योजनालाई बहुवर्षीय ठेक्का आव्हान गर्न मन्त्रालयमा स्रोत सहमतिका लागि प्रस्ताव गरिएको छ ।
झोलुङ्गे पुल बाहेकका आयोजनाहरू चालु आर्थिक वर्षभित्रनै सम्पन्न हुने प्रतिनिधिसभा सदस्य खमबहादुर गर्बुजा (खम्बिर)ले बताउनुभयो । योजनाहरु मार्फत ग्रामिण क्षेत्रमा सहज यातायात सेवाको पहुँच विस्तार भई बसाइसराई घटाउने अपेक्षा गरिएको उहाँले बताउनुभयो ।
सघन सहरी तथा भवन निर्माण योजना मार्फत चार करोड ७५ लाख बजेट बिनियोजन भएको बेनी नगरपालिकामा एकिकृत सहरी पूर्वाधार विकास गर्ने कार्यक्रम अन्तर्गत तीन करोड १९ लाखमा ठेक्का सम्झौता भएको बेनी नगरपालिका–८ कालीपुल देखि वडा–७ मा रहेको दरवाङ बसपार्क जोड्ने बेनी चक्रपथ सडक ढलान गर्ने योजना सुरु भएको छ ।
उक्त कार्यलय मार्फत ६५ लाख ३८ हजार ५३ को लागतमा कुहुँ–टोड्के–झि र एक करोड तीन लाख २८ हजार ६२ मा मौवाफाँट–दग्नाम–दरमिजा–चिमखोला हुदै कुइनेमङ्गले सडक स्तरोन्नति योजना कार्यान्वयन भएको छ । योजनाका इन्जिनियर बिरबल सुनारले ५० शय्या क्षमताको बेनी अस्पतालको भवन निर्माण अन्तिम चरणमा पुगेको जानकारी दिनुभयो ।
स्थानीय पूर्वाधार विकास आयोजना मार्फत चार करोड ७० लाख ३६ हजार दुई सय ५० को लागतमा धवलागिरि गाउँपालिकाको मराङखोला माथी तीन सय ६५ र मुनाको दरखोला माथी तीन सय ५५ मिटर लामो झोलुङ्गे पुल निर्माणाधिन छन् ।
आयोजनाका इन्जिनिनियर मनिष अधिकारीले धवलागिरि गाउँपालिका–४ बगर तातोपानी कुण्ड जाने बाटोमा म्याग्दी नदी माथि दुई सय ५० मिटर लामो झोलुङ्गे पुल निर्माणका लागि चालु आर्थिक वर्षमा ६० लाख बजेट विनियोजन भएको योजना कार्यान्वयनका लागि ठेक्का प्रक्रीयामा रहेको जानकारी दिनुभयो ।
उहाँका अनुसार सडक पूर्वाधार विकास कार्यक्रम मार्फत पाखापानी–कुइनेमङ्गले–मल्कवाङ, गलेश्वर–दशमुरे–मौवाफाँट–दग्नाम–दरमिजा–कुइनेमङ्गले–घ्यासीखर्क सडक स्तरोन्नतिका लागि ठेक्का सम्झौता गरेका निर्माण कम्पनीहरूले ढलान, पक्की नाला र टेवा पर्खाल निर्माण थालेका छन् ।
वैकल्पिक सहायक राजमार्ग विकास कार्यक्रम मार्फत मौवाफाँट–दग्नाम–दरमिजा–चिमखोला हुँदै कुइनेमङ्गले, कुहुँ–टोड्के हुदै झिँ, अन्नपूर्ण गाउँपालिकाको दोसल्ले–काफलडाडा–नागी, मालिकाको छ्यारछ्यारे हुँदै मङ्गलाको टिकावाङ र बेनी नगरपालिकाको अर्थुङ्गे देउराली–भराले–पुत्लेढुङ्गा सडक आयोजना कार्यान्वयनमा रहेका छन् ।
एक करोड बजेट विनियोजन भएको धवलागिरि गाउँपालिकाको लुलाङ–गुर्जा सडक स्तरोन्नति योजना ठेक्का प्रक्रीयामा छ । रु. ५० लाख बजेट बिनियोजन भएको बेनीको मङ्गलाघाट र बगरफाँट जोड्ने म्याग्दी नदीमा मोटरेबल पुल निर्माण सम्बन्धी योजनाको बहुवर्षीय ठेक्का आव्हानका लागि गरिएको प्रस्ताव अर्थ मन्त्रालयले स्वीकृत गरेको छैन् । रासस
