काठमाडौँ, माघ ३ गते । इटालियन सिरी ‘ए’ फुटबलमा एसी मिलानलाई स्पेजियाको नमिठो धक्का लागेको छ । घरेलु मैदानमा सोमबार राति भएको खेलमा मिलान अग्रता जोगाउन नसक्दा स्पेजियासँग २–१ गोलले पराजित भयो ।
मिलानलाई हराउन स्पेजियाका केभिन एगुडेलो र इमानुएल ग्यासीले गोल गर्नभयो । मिलानका राफयल लियोको सुरुवाती गोल गोल सान्त्वनामा परिणत भयो । ४५औँ मिनेटमा थियो हर्नान्डेज पेनाल्टीमा चुक्दा मिलानले अग्रता लिन सकेको थिएन । तर, लगत्यै पहिलो हाफको इन्जुरी समयमा राफायल लियोले गोल गर्दै मिलानलाई सुरुवाती अग्रता दिलाउनुभयो ।
दोस्रो हाफमा खेलमा फर्किएको स्पेजियाले ६४औँ मिनेटमा बराबरी गोल फर्कायो । केभिनले गोल गर्दै खेललाई बराबरीमा ल्याउनुभयो । त्यसपछि दोस्रो हाफको इन्जुरी समयमा इमानुएलले गोल गरेपछि घरेलु टोली मिलान स्तब्ध बनेको थियो ।
हारसँगै मिलानले शीर्षस्थानमा उक्लने मौका गुमाएको छ । दोस्रो स्थानमा रहेको मिलानको २२ खेलबाट ४८ अंक छ । शीर्षस्थानमा रहेको इन्टर मिलानको २१ खेलबाट ५० अंक छ । मिलानलाई हराएको स्पेजिया २२ अंकसहित १४औँ स्थानमा छ ।
अन्य खेलमा नापोलीले बोलोग्नालाई २–० गोलले हराएको छ । जितसँगै तेस्रो स्थानमा रहेको नापोलीको ४६ अंक छ । पराजित बोलोग्ना २७ अंकसहित १३औँ स्थानमा छ । अर्को खेलमा फियोरेन्टिनाले जेनोआलाई ६–० गोलले पराजित गरेको छ । एजेन्सी
