गाउँपालिका आफै लाग्यो विद्युतीकरणमा

सिराजुद्दिन खान

bidhut_3नेपालगञ्ज, साउन २८ गते । बाँकेको राप्तीपारिका बासिन्दाको वर्षौंदेखिको बिजुली बाल्ने सपना पूरा गर्न राप्तीसोनारी गाउँपालिकाले आफ्नै लगानीमा विद्युत् विस्तार सुरु गरेको छ ।
दस वर्ष पहिले सुरु भएको विद्युतीकरणको काम ठेकेदारले अलपत्र पारेपछि राप्तीसोनारी गाउँपालिकाले वडा नम्बर ३, ४ र ५ मा विद्युत् विस्तार गर्न आवश्यक प्रक्रिया अगाडि बढाएको जनाएको छ ।
विद्युत्का लागि जनताले पटकपटक आवाज उठाइरहेकाले अब गाउँपालिकाको आफ्नै लगानीमा विद्युत् विस्तार गर्न लागिएको गाउँपालिकाका अध्यक्ष लाहुराम थारूले बताउनुभयो । वर्षौंदेखि अन्धकारमा रहेको राप्तीपारि क्षेत्रमा अझै पनि विद्युत् नपुगेको र छिटै पुग्ने छाँटकाँटसमेत नदेखिएपछि आफ्नै लगानीमा विद्युत् विस्तार गर्ने निर्णय गरिएको उहाँले बताउनुभयो ।
राप्तीसोनारी गाउँपालिका–४, धामपुरमा विद्युत् सबस्टेसन निर्माण भए पनि कोहलपुर–धामपुर ३३ केभी प्रसारण लाइनको काम ठेकेदारको ढिलासुस्तीले एक दशकदेखि अलपत्र छ ।
काम अलपत्र पार्ने ठेकेदारसँगको ठेक्का सम्झौता नेपाल विद्युत् प्राधिकरणले तोडेपछि ठेकेदार अदालतमा गएकोले विद्युतीकरणको काम झनै अन्योलमा परेको छ । सोही कारणले अब गाउँपालिकाले नै विद्युत् प्राधिकरणसँग समन्वय गरेर बाँकी रहेको काम पूरा गरी सो क्षेत्रलार्ई झिलीमिली बनाउने योजना बनाएको गाउँपालिकाले जनाएको छ ।
गाउँपालिकाको १ स्थित ‘कुसुम सामुदायिक ग्रामीण विद्युत् सहकारी संस्था लिमिटेड’मार्फत ११ केभी प्रसारण लाइन वडा नम्बर ३, ४ र ५ मा विद्युत् विस्तार गर्ने प्रक्रिया अगाडि बढाइसकिएको जनाइएको छ । चालू आर्थिक वर्ष २०७६÷७७ भित्र सबैभन्दा नजिक रहेको वडा नम्बर ३ सम्म विद्युत् विस्तार गर्ने र लगत्तै वडा नम्बर ४ र ५ मा पनि काम थाल्ने गाउँपालिकाको योजना छ । विद्युतीकरणका लागि गाउँपालिकाले यस वर्ष एक करोड ३९ लाख रुपियाँ छुट्याइसकेको अध्यक्ष थारूले जानकारी दिनुभयो । गाउँपालिकाले विद्युत् विस्तारको काम थालेपछि राप्तीसोनारीका वडा नम्बर ३, ४ र ५ का स्थानीय बासिन्दा हर्षित भएका छन् । वर्षौंदेखिको बिजुली बाल्ने सपना छिट्टै पूरा हुने उनीहरूको आशा छ ।
विद्युत् लाइन विस्तार गर्न अहिले सर्भेको काम सुरु भइसकेको कुसुम सामुदायिक ग्रामीण विद्युत् सहकारी संस्था लिमिटेडले जनाएको छ । नेपाल विद्युत् प्राधिकरणका प्राविधिकले वडा नम्बर १ को सिक्टा गाउँदेखि वडा नम्बर ३ सम्म सर्भेको काम सुरु गरेको संस्थाका कोषाध्यक्ष गेहेन्द्रकुमार खड्काले बताउनुभयो । सर्भेको काम सम्पन्न भएपछि लागत स्टिमेट तयार हुने उहाँले बताउनुभयो ।
अबको छ महिनाभित्रमा राप्तीसोनारी गाउँपालिकाको वडा नम्बर ३ मा विद्युत् लाइन विस्तार गरिसक्ने लक्ष्य राखिएको सहकारीले जनाएको छ ।

  

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds