पीडितलाई आश्रयसँगै बाँच्ने आधार

शिवा तामाङ

Online logoकाठमाडौँ, साउन २८ गते । बाह्र वर्षमा विवाह, १५ वर्षमा पहिलो सन्तान । दुई छोरीको जन्मपछि श्रीमान्ले छोराको माग राख्न थाले । तेस्रो सन्तानका लागि गर्भवती भएकी काभ्रेकी सरला चौलागार्इं परिवारको कचकच सहन नसकेपछि माइत लाग्नुभयो । सरलाले माइतीमै तेस्रो सन्तान पनि छोरी जन्माएपछि घरको ढोका बन्द भयो ।
माइतीको आश्रयमा सरलाको सङ्घर्ष निकै कठिन ढङ्गले बढ्दै थियो । त्यसै क्रममा ‘महिला आधारशीला’को सम्पर्कमा पुग्नुभएकी सरलाले सिलाइ, बुनाइ सिक्ने अवसर पाउनुभयो । त्यही सीप र श्रमले तीन छोरीको शिक्षादीक्षा सम्भव भयो । उहाँ भन्नुहुन्छ, “तीन छोरीको पालन, पोषण र शिक्षादीक्षामा मेरो आधारशीला नै बन्यो महिला आधारशीला”, उहाँले थप्नुभयो, “आधारशीलाले कलिला बच्चा च्यापेर भौतारिँदा गाँस, बास र जीवनको थोरै आश दियो । ”
उदयपुरकी भावना कोइरालाको जीवन कथा पनि उस्तै छ । विवाहको तीन वर्षमै द्वन्द्वका बेला पति बेपत्ता भए । काखमा डेढ वर्षको सन्तान । खेतीको उब्जनीले खानै नपुग्ने । भावना भन्नुहुन्छ, “जीवनको त्यो सङ्कटमा मैले आधारशीलाको साथ पाएँ । ”
आधारशीलाको आवास गृहमा आश्रय पाएपछि भावनाले मन्टेश्वरीको तालिम लिनुभयो । संस्थाकै मन्टेश्वरीमा काम गर्नुहुने भावना भन्नुहुन्छ, “तालिमले आत्मविश्वास बढ्यो । जहाँ गए पनि गरिखान्छु भन्ने हिम्मत पलाएको छ । ” वि.सं. २०५२ मा स्थापना भएको महिला आधारशीलाले सरला र भावनाजस्ता घरेलु हिंसामा परेका पाँच हजार महिलाको उद्धार र पुनः स्थापना गरिसकेको छ ।
आधारशीलाकी अध्यक्ष रेणु शर्मा भन्नुहुन्छ, “हिंसा पीडित महिलालाई सर्वप्रथम सुरक्षित आवास, त्यसपछि सीपमार्फत आत्मनिर्भर बनाउने संस्थाको उद्देश्य हो । ” उहाँ भन्नुहुन्छ, “घरेलु हिंसाको मुख्य कारण सीप र शिक्षाको अभाव नै हो । त्यसैले सीप र शिक्षामा जोड दिन थाल्यौँ । ”
संस्थाका महासचिव कमला उप्रेतीका अनुसार हिंसा पीडित महिला र सीप सिकेर आत्मनिर्भर बन्न चाहने अन्य महिलालाई संस्थाले निःशुल्क तालिम दिँदै आएको छ । संस्थाले सल बुन्ने, जुत्ता बनाउने, हाउस वायरिङ, मोबाइल मर्मत गर्नेलगायत तालिम दिँदै आएको छ । उहाँका अनुसार एउटा सल तयार हुन १७ वटा विभिन्न चरणमा काम गर्नुपर्ने हुन्छ । अहिले सबै काम एकै ठाउँमा महिलाले नै गर्ने गरी तयारी भइरहेको छ ।
भक्तपुर, काभे्र, सुनसरी, मोरङ र झापालगायत ११ जिल्लामा शाखा विस्तार गरेको आधारशीलाले काठमाडौँ, भक्तपुरमा हिंसा पीडित महिलाको उद्धार र संरक्षण मात्र गरिन्छ । हिंसा पीडित महिलालाई मनोवैज्ञानिक परामर्श दिएर आत्मविश्वास बढाउने कार्यसमेत गरिने संस्थाका महासचिव उप्रेती बताउनुहुन्छ ।
संस्थाका अनुसार आधारशीलामा प्रशिक्षित महिलाले हाते तानको सहयोगमा उत्पादन गरेका सल जर्मनी, स्वीट्जरल्यान्ड, क्यानडालगायत मुलुकमा वार्षिक एक करोड रुपियाँको निर्यात हुँदै आएको छ ।   

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds