गाउँलेले भत्काएको घर सार्वजनिक जग्गामा भएको पुष्टि

शैलेन्द्र रोकाया 

बझाङ, साउन १७ गते । बझाङको  बित्थडचिर गाउँपालिका–७ स्याल ढुड्ढा जातीय विभेद गरेर दलितको निर्माणधीन घर भत्काएको विवादपछि घर  सार्वजनिक खाली खाल्सा गौचरन जमिन भएको पृष्टी भएको छ । नापी कार्यालय र मालपोत कार्यालय झोताको टोलीले घटनास्थलमा पुगेर नापचाँच गर्दा जमिन सार्वजनिक जग्गामा परेको पुष्टी भएको हो । 

गएको साता  स्थानीय  पुड्को ओखेडाले आफूमाथि कथित उपल्लो जातिका मान्छेले निर्माणधीन घर भत्काएको भन्दै जिल्ला प्रहरी कार्यालयमा न्यायका लागि निवेदन दिएका थिए ।

मंगलबार स्थानीय जनप्रतिनिधि, प्रहरीको रोहबरमा दुवै पक्षलाई राखेर जग्गा विवादको समस्या समाधान गरिएको हो । देयलेख प्रहरी चौकीका प्रहरी सहायक निरीक्षक घनसिंह ठकुन्नाले भन्नुभयो, “हामीले सबै पक्षलाई राखेर जग्गा छुट्याएका छौं  पुड्को ओखेडाको पुरानो बस्दै आएको घरसमेत सार्वजनिक जग्गामा परेको छ । पुरानो घरको आगनसम्म मात्र नापी भएको जग्गा छ । ’’

धामी गाउँ निवासी दलित दुई परिवार २५ वर्ष अगाडिदेखि स्यालढुड्ढामा बसोवास गर्दै आएका थिए । दलित परिवारको एउटा कित्ता दर्ता भएर घर आवास बनाएको र बाँकी रहेको दर्ता जग्गासँग जोडिएको सार्वजनिक जग्गा अतिक्रमण गर्दै आएपछि गाउँलेहरुले पुड्को आखेडाको निर्माणधिन घर र केही खेती बारी अघिल्लो साता  हटाएको हो  । घर टहरा गाउँलेहरुले हटाएको विषयमा बाहुनको बस्तीमा जातीय छुवाछुत गरेर हटाएको भन्दै व्यापक आलोचना भएको थियो । 

जिल्ला प्रहरी कार्यालय चैनपुरमा भेटिएका सोही वडाका कार्यबाहक वडा अध्यक्ष मुकुन्द जोशीले भन्नुभयो, “यो जातीय विभेद र कुनै पनि आग्रह पूर्वाग्रहले गरिएको घटना होइन । खाली खल्सा जमिनमा घर लगाएर सार्वजनिक जग्गा अतिक्रमण गर्न खोजेपछि गाउँलेहरुले बल प्रयोग गरेका हुन्। गाउँलेले कानुन हातमा लिनु गलत हो ।”   

 गाउँलेहरुले कानुन हातमा लिएर गरेको काम गैरजिम्मेवार  भएको प्रहरी नायब उपरीक्षक जागेश्वर भण्डारीले बताउनुभयो । उहाँले अभद्र व्यवहारमा मुद्दा दर्ता भएर कानुनी प्रकृयामासमेत गइसकेको बताउनुभयो ।