हुलाकी सडक हिलाम्य, बाटो अवरुद्ध

 

hulaki-sadak

धीरेन्द्रप्रसाद साह/राजविराज
राजविराज, असार २५ गते । बहुचर्चित सडक आयोजना हुलाकी राजमार्ग हिलैहिलो भएका कारण आवतजावत नै अवरुद्ध भएको छ । लगातार तीन दिनदेखि परेको पानीले सडकमा प्रयोग गरिएको चिप्लो माटो हिलाम्य हुँदा हिँडन नसकिने अवस्थामा पुगेको हो ।
हुलाकी राजमार्ग अन्तर्गत सप्तरीको विष्णुपुर गाउँपालिका, डाक्नेश्वरी नगरपािलका, खडक नगरपालिकाको विभिन्न स्थानमा हिलोले बाटो चिप्लो भए पछि आवतजावत नै अवरुद्ध भएको हो । राजविराज नगरपालिकासँग टाँसिएको विष्णुपुर गाउँपालिकाको जमुनी, डाक्नेश्वरीको विषहरिया लगायतको स्थानमा हिलामै कै कारण सवारी साधन चलाउन नै बन्द गर्नु परेको अटो रिक्सा चालक सुकुमार साहले बताउनुभयो । एक दर्जन भन्दा बढीको संख्यामा सञ्चालनमा रहेको अटो रिक्सा, सफारी, भाडाका जीप चल्न बन्दा भएको अर्का चालक विष्णु यादवले जानकारी दिनुभयो ।
भाडाका सवारी साधन सञ्चालनमा नआएपछि निजी मोटरसाइकल, साइकलमा राजविराज आउने र घर फर्किन १० मिनेटको बाटो तय गर्न एक घण्टा लाग्ने गरेको बताइएको छ । मोटरसाइकल, साइकल ती सडक खण्डमा हिलोमा चिप्लेर आधा दर्जन भन्दा बढी मोटरसाइकल दुर्घटनामा परेको प्रत्यक्षदर्शी डम्बर साहले बताउनुभयो । निर्माण कम्पनीले वर्षा अगाडि लामो समयदेखि माटो हालेर थप काम नगर्दा सामान्य वर्षामा बाटोमा हिड्न सकिने अवस्था छैन, स्थानीय बिरेन्द्र दासले भन्नुभयो, निमार्ण कम्पनीले आधा भाग ग्राभेल र आधा भाग माटोको काम गरेको भए यस्तो अवस्था हुदैन्थ्यो । माटो हालेको चार÷पाँच महिना भयो, त्यसपछि थप काम गरेनन् ।
हुलाकी राजमार्गको स्तरोन्नती कार्य कछुवाको गतिमा भइरहेकोले मलेकपुर, खुरहुरिया, महुकी, विषहरिया, कुशहा, अर्नाहा, बनौली, सिम्रहा सिग्यौन, बेलही चपेना लगायत दुई दर्जन गाउँका बासिन्दाले सास्ती भोगनु परेको छ ।
तराई–मधेश विकासको मेरुदण्डको रुपमा बहुचर्चित हुलाकी सडकको स्तरोन्नती र पुल निर्माण कार्य कछुवा गतिमा चलिरहेको छ । वर्षाको प्रभावलाई मध्यनजर नगरी बाटो नै अवरुद्ध हुने गरी निर्माण कम्पनीले काम गर्दा बाटो अवरुद्ध भएको छ । बाटो अवरुद्ध हुँदा पाँच किलो मिटर बाटोको सट्टा ३० किलो मिटर लामो घुमारो बाटो तय गरी गन्तव्यमा पुग्न बाध्य भएको स्थानीवासीहरु बताउँछन । तराई–मधेशको कृषि उत्पादनलाई बजारीकरण, विद्यालयसम्मको सहज पहँँुच, स्वास्थ्य सेवा लगायत सबै क्षेत्रको विकासको आधार हुलाकी राजमार्ग भएका कारण स्तरोन्नती र पुल निर्माण कार्य भइरहेको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds