गायक स्वयम्भूराज शाक्यको सांगीतिक प्रस्तुति हुँदै

lifa soya

गोरखापत्र समाचारदाता

काठमाडौँ, जेठ २० गते । वरिष्ठ गायक स्वयम्भूराज शाक्यको एकल सांगीतिक प्रस्तुति “जुजु वेयर्स ओ प्रिय लिफः स्वयाः” सांगीतिक साँझ यही शनिवार हुँदैछ । मंगल इन्टरटेनमेन्टको आयोजनामा हुने कार्यक्रम गायक शाक्यको जन्मस्थाल ललितपुरको हःखा टोलस्थित कोतमा आयोजना हुने पत्रकार सम्मेलनमा जानकारी गराइएको छ । साँझको ५ बजे शुरु हुने उक्त कार्यक्रममा गायक शाक्यलाई संगीता शाक्य, नीशा देसार, सुमन कपाली, अनु शाक्य, प्रियंका शाक्य र चन्द्रमान शाक्यले साथ दिँदैछन् भने उक्त प्रस्तुतिमा भूपेन्द्र बज्राचार्यको संयोजनमा ८ जना वाद्यवादक संगीतकारको साथ रहनेछ ।

रेकर्डिङ सहज र सुलभ नभएको बेला एउटा कोठामा वाद्यवादक तथा गायक/गायिका र अर्को कोठामा प्रविधि र प्राविधिका साथ रेकर्ड गरिएको गीत “ओ प्रिय लिफः स्वयाः” निकै लोकप्रिय गीत हो भने यही गीतबाट यस कार्यक्रमको नाम राखिएको छ । यो गीत गायक स्वयम्भूराज शाक्य तथा गायिका सपनाश्रीले तीनदशक अघि गाएको गीत हो ।

एकल सांगीतिक प्रस्तुतिमा मविवि शाह, दिनेश अधिकारी, वंशीधर बज्राचार्य, प्रकाश साय्मि, शाक्य सुरेन, चन्द्रमान शाक्य, तीर्थ माली, शान्त शाक्य, हेमन्त विवशका रचना समावेश हुनेछन् भने शाक्यका साथै नातिकाजी, तीर्थ माली, मनराजा नकर्मी, नरेन्द्र प्यासी, चन्द्रमान शाक्य, विरेन शाक्य, चन्द्रराज शर्माको संगीत सजिएको गीतहरु गुञ्जिनेछन् ।

रेडियो नेपालका विशिष्ट श्रेणीका गायक शाक्य विभिन्न पुरस्कार तथा सम्मानबाट सम्मानित हुनुहुन्छ । हालसम्म सार्वजनिक भएका पाँच गीति संग्रहसहित २५० भन्दा बढी गीत छन् । यसभन्दा अघि तीनवटा एकल सांगीतिक प्रस्तुति दिइसक्नु भएका गायक शाक्यको यो प्रस्तुति दर्शकका लागि निःशुल्क आयोजना गरिएको पहिलो एकल प्रस्तुति हो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds