बजेट साँच्चिकै राम्रो आउँछ : पौडेल

गोरखापत्र समाचारदाता

bishnu paudelकाठमाडौँ, जेठ १३ गते । नेपाल कम्युनिस्ट पार्टी (नेकपा) का महासचिव तथा पूर्वअर्थमन्त्री विष्णुप्रसाद पौडेलले जनतामा नयाँ आशा र आत्मविश्वासको सञ्चार गर्ने गरी नयाँ बजेट आउने बताउनुभएको छ ।
पूर्वअर्थमन्त्री पौडेलले गोरखापत्रको साप्ताहिक संवादका क्रममा नेपाली जनताको अपेक्षालाई पछ्याउँदै बजेट साँच्चिकै राम्रो आउने स्पष्ट पार्नुभयो । आर्थिक वर्ष २०७६÷७७ को बजेट जेठ १५ गते संसद्मा पेस हुँदै छ ।
पूर्वअर्थमन्त्री पौडेलले भन्नुभयो, “राष्ट्रिय अर्थतन्त्र बलियो बनाउने, राष्ट्रको औद्योगीकरण र आधुनिकीकरण तथा रोजगारी सिर्जना गर्ने बजेट आउँछ । बजेटले सामाजिक न्याय सुनश्चित समेत गर्ने छ ।”
उहाँले विगत वर्षहरूमा विकास बजेट अपेक्षाअनुसार खर्च नहुने समस्यालाई सम्बोधन गर्न सार्वजनिक खरिद ऐनमा संशोधन, निर्माण व्यवसायीलाई उत्तरदायी बनाउने र कर्मचारीतन्त्रको कार्यशैली सुधारजस्ता विषयमा ध्यान दिइने बताउनुभयो ।
उहाँले सरकारको एक वर्षको काम अपेक्षाअनुरुप नै भएको चर्चा गर्दै थप्नुभयो, “यो परिस्थितिमा सरकारले एक वर्षमा जे गर्नुपर्ने थियो, त्यो गरेको छ । यो ऐन कानुन निर्माण, संरचनाको व्यवस्थापनका हिसावले आधार वर्ष हो । अब हामी विकास र निर्माणको समृद्धिको यात्रामा ‘गियर चेन्ज’ गरेर अगाडि बढ्छाँै ।”
उहाँले केही हप्ताभित्रै पार्टी एकताको सम्पूर्ण प्रक्रिया टुङ्गो लगाएर पार्टी विधानले दिएको समयसीमाभित्र महाधिवेशन सम्पन्न गरिसक्ने स्पष्ट पार्नुभयो । उहाँले भन्नुभयो, “एक वर्षभित्र जनवर्गीय सङ्गठन, गाउँपालिका, जिल्ला, प्रदेशहुँदै महाधिवेशन सम्पन्न गरिसकिने छ । सकिएन भने पनि विधानले दिएको सुविधा छ महिना थप गर्न सकिने व्यवस्था त छँदैछ ।”
उहाँले भन्नुभयो, “जनताको बहुदलीय जनवाद, २१ औं शताब्दीको जनवाद र माओवादबारे महाधिवेशनको प्लेटफर्मसम्म पुगेर निर्णयमा पुग्छौं ।”
नेता पौडेलले भन्नुभयो, “सैद्धान्तिक रुपमा हामी कुन दिशातर्फ अगाडि बढ्छौ भन्ने कुरा धेरै हदसम्म हाम्रो प्रतिवेदन र विधानले बताइसकेको छ । त्यो विधान र प्रतिवेदनको मार्गदर्शनलाई पछ्याएर अगाडि बढ्यौ भने कहाँ पुगिन्छ भनेर ठम्याउन सकिन्छ ।” उहाँले आउने महाधिवेशन एकता र सहमतिको महाधिवेशन हुने समेत स्पष्ट पार्नुभयो ।

 

थप समाचार
प्रतिकृया
नाम

ईमेल

ठेगना