एकल बिन्दु सेवा केन्द्र आजदेखि


गोपालचन्द्र सुवेदी

काठमाडौँ, जेठ १ गते । नेपालमा लगानीको वातावरण सहज बनाउन अपरिहार्य मानिँदै आएको एकल बिन्दु सेवा केन्द्र बुधबारबाट सञ्चालनमा आउँदै छ । दुई दशकको प्रतिक्षापछि लगानीकर्तालाई एकल बिन्दुबाट सबै प्रकारका सेवा उपलब्ध गराउने उद्देश्यले यो सरकारी संरचनाकोे सेवा सुरु हुन लागेको हो ।
सेवा सुरु भएपछि उद्योग सञ्चालनका लागि आवश्यक परामर्शदेखि दर्तालगायतका सबै सेवा एकै स्थलबाट उपलब्ध हुने छ । नेपालमा उद्योग सञ्चालन गर्न चाहने उद्यमीले आवश्यक प्रक्रिया पु¥याउन करिब तीन दर्जन निकाय धाउनुपर्ने वर्तमान अवस्थाको अन्त्य हुने अपेक्षा गरिएको छ । यो केन्द्रबाट उद्योग सञ्चालन गर्न चाहने लगानीकर्ताले आवश्यक परामर्शदेखि, दर्ता प्रक्रिया, जग्गा प्राप्ति, मुद्रा तथा विनिमय, अध्यागमनलगायतका २४ विभिन्न सेवा एकै स्थानबाट पाउने छन् ।
नेपालको औद्योगिकीकरण अभियानलाई थप गतिशील बनाउने लक्ष्यसहित २०४९ सालदेखि नै एकल बिन्दु सेवा केन्द्रको अवधारणा ल्याइए पनि त्यसले मूर्त रूप पाउन सकेको थिएन । पछिल्लो समय नेपालमा विदेशी लगानीका लागि समेत अनुकूल वातावरण बनाउन यस्तो पूर्वाधार अपरिहार्य रहेको महसुस भएपछि यो कामले तीव्रता पाएको थियो । department
गत चैत १५ र १६ गते काठमाडौँमा सम्पन्न लगानी सम्मेलन पहिले नै एकल बिन्दु सेवा केन्द्र सञ्चालनमा ल्याउने प्रयास गरे पनि भवन तयार नभएको हुनाले सफल भएको थिएन ।
राजधानीको त्रिपुरेश्वरस्थित उद्योग विभाग परिसरको भवनमा सञ्चालनमा ल्याउन लागिएको एकल बिन्दु सेवा केन्द्रबाट चौध विभिन्न एकाइअन्तर्गत २४ विभिन्न सेवा उपलब्ध गराउने तयारी उद्योग विभागको छ ।
तत्कालका लागि आठ विभिन्न एकाइ स्थापना गरिएको छ । त्यसका लागि विभिन्न निकायबाट आउने कर्मचारी पनि आइसक्नुभएको छ, विभागका महानिर्देशक विनोदप्रकाश सिंहले भन्नुभयो, “भौतिक संरचना पनि तयार गरिएको छ । ”
सेवा केन्द्रमा भन्सार तथा राजस्व, प्रवेश आज्ञा सहजीकरण, ऊर्जा तथा सञ्चार पूर्वाधार, जग्गा सहजीकरण, दर्ता, वातावरण, विदेशी विनिमय प्रशासन तथा कानुनी एकाइ राखिएका छन् । यी एकाइमा भन्सार विभाग, उद्योग विभाग, अध्यागमन विभाग, नेपाल राष्ट्र बैङ्क, कानुन मन्त्रालयबाट अख्तियार प्राप्त कर्मचारी कार्यरत रहनेछन् । केन्द्रमा ४१ जना कर्मचारीको दरबन्दी निर्धारण गरिएको छ ।
सेवा केन्द्रबाट उद्योग अनुमति, वातावरणीय प्रभाव मूल्याङ्कन, उद्योग दर्ता, भन्सारका आयात निर्यात अनुमति सुविधा, विदेशी विनिमयलगायत सुविधा उपलब्ध हुनेछन् ।
सेवा केन्द्र सञ्चालनका लागि उद्योग वाणिज्य तथा आपूर्तिमन्त्री मातृका यादवको अध्यक्षतामा सोमबार सरोकारवाला सबै निकायका अधिकारी सम्मिलित बैठक बसेको थियो । बैठकमा मन्त्री यादवले केन्द्रमा रहने एकाइ र तालुकदार निकाय प्रमुखहरूलाई आवश्यक तयारी सम्पन्न गर्न निर्देशन दिनुभएको थियो । बैठकमा सरोकारवाला सबै मन्त्रालयका सचिव, नेपाल राष्ट्र बैङ्कका गभर्नर, उद्योग विभाग, भन्सार विभाग, कम्पनी रजिष्ट्रार कार्यालयका प्रमुखहरूको सहभागिता थियो ।
एकल बिन्दु सेवा सञ्चालनका लागि यही वैशाख १६ गते सरकारले राजपत्रमा औपचारिक सूचना प्रकाशित गरेको थियो ।
खुला बजार अर्थतन्त्रलाई अङ्गिकार गर्दै आएपछि २०४९ सालमै ल्याइएको औद्योगिक नीतिमा पहिलोपटक एकल बिन्दु सेवा केन्द्र सञ्चालनमा ल्याउने कुराले प्रश्रय पाएको थियो तर लामो समय यस विषयले मूर्त रूप पाउन सकेन । औद्योगिक व्यवसाय ऐन– २०७३ को दाफा ३५ मा एकल बिन्दु सेवा केन्द्र सञ्चालन गर्ने उल्लेख छ । आगामी आर्थिक वर्षको नीति तथा कार्यक्रम घोषणाका क्रममा एकल बिन्दु सेवा केन्द्र जेठ १ गते नै सञ्चालनमा ल्याउने बताइएको थियो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds