बुद्ध मूर्ति राखेर लुम्बिनी भ्रमण वर्षको शुभारम्भ


भैरहवा समाचारदाता

भैरहवा, वैशाख १ गते । पर्यटक आगमन बढाउन बेलहिया–बुटवल छ लेन सडकमा बुद्ध मूर्ति अनावरण गर्दै रुपन्देहीको तिलोत्तमा नगरपालिकाले लुम्बिनी भ्रमण वर्षको शुभारम्भ गरेको छ । २४ किलोमिटर छ लेन सडकमा सबैभन्दा धेरै ११ किलोमिटर क्षेत्रफल ओगटेको तिलोत्तमाले आफ्नो क्षेत्रमा पर्ने सडकमा बुद्धमूर्ति राख्न थालेको हो । प्रदेश सरकारले २०७६ लाई लुम्बिनी भ्रमण वर्षको रुपमा घोषणा गरेकाले यसलाई साकार पार्न नयाँ वर्षकै अवसर पारेर तिलोत्तमा नगरपालिकाले बुद्ध र्मूिर्त स्थापना गरेको हो ।Buddha murti
तिलोत्तमा–२ योगीकुटीदेखि पडसरी सम्मको क्षेत्रमा प्रत्येक दुईसय मिटरको क्षेत्रमा बुद्धमूर्ति राख्ने योजना नगरपालिकाले बनाएको छ । यसअनुसार करिव ५० वटा बुद्धमूर्ति राखिने छ ।
आइतबार बुद्धमूर्तिको अनावरण गर्दै प्रदेश पाँच सरकारका उद्योग, पर्यटन, वन तथा वातावरणमन्त्री लिला गिरीले प्रदेश सरकारले घोषणा गरेको लुम्बिनी भ्रमण वर्षलाई सफल बनाउन यो अभियान सार्थक हुने विश्वास व्यक्त गर्नुभयो ।
प्रदेश सरकारले भने आगामी बुद्धपूर्णिमा देखि लुम्बिनी भ्रमण वर्षको औपचारिक शुभारम्भ गर्ने जानकारी दिंदै उहाँले पर्यटक आगमन वृद्धि गर्न, सडक सौन्दर्यकरण गर्न र हरियाली प्रवद्र्धन गर्न तिलोत्तमा नगरपालिकाले थालेको अभियान प्रशंसनीय रहेको बताउनुभयो ।
“यो अभियानमा हरेक नगरबासीको साथ र सहयोग आवश्यक छ, प्रदेश सरकारको योजनामा स्थानीय तहको साथ झनै महत्वपूर्ण रहन्छ”–उहाँले भन्नुभयो । मुलुकलाई सबैखाले हिंसा र द्वन्द्वबाट मुक्त गरी शान्तिको मार्गमा हिंडाउन बुद्धका उपदेश अहिले पनि त्यत्तिकै सान्दर्भिक रहेको भन्दै मन्त्री गिरीले लुम्बिनी भ्रमण वर्षमा पर्यटक आगमन बढाउने खालका योजना बनाउन स्थानीय सरकारहरुलाई आग्रह गर्नुभयो ।
कार्यक्रममा बोल्दै तिलोत्तमा नगरपालिकाका प्रमुख वासुदेव घिमिरेले प्रदेश सरकारले २०७६ लाई लुम्बिनी भ्रमण वर्षको रुपमा घोषणा गरेकाले यसलाई सार्थक तुल्याउन नगरपालिकाले सडकको बीच भागमा बुद्धमूर्ति राखेर पर्यटकलाई आकर्षित गर्न खोजेको बताउनुभयो । चालु आर्थिक वर्षको बजेटबाट तिलोत्तमा नगरपालिकाको मंगलापुरसम्म बुद्धमूर्ति स्थापना गर्ने बताउँदै उहाँले बाँकी क्षेत्रमा बुद्धमूर्ति स्थापनाका लागि आगामी वर्ष बजेट विनियोजन गरिने जानकारी दिनुभयो । बुद्ध मूर्ति राखेसँगै भारतबाट नेपाल प्रवेश गर्ने जो कोहीलाई बुद्धको देशमा प्रवेश गरेको अनुभूति दिलाउने भएकाले यो कामलाई जतिसक्दो छिटो सम्पन्न गरिने उहाँले बताउनुभयो ।
नगर उपप्रमुख जगेश्वरदेवी चौधरीले बुद्धले लुम्बिनीमा जन्मेर विश्वभर शान्तिको सन्देश प्रवाह गरेकाले यसको प्रचारमा सहयोग पुगोस् भन्नका लागि पनि नगरपालिकाले यो अभियान सुरु गरेको बताउनुभयो । उहाँले नगरलाई बुद्धमय बनाउने अभियानलाई प्राथमिकतामा राखेर काम गर्ने पनि बताउनुभयो ।
कार्यक्रममा नेकपाका तिलोत्तमा नगर अध्यक्ष मोहन चापागाईं, नेपाली काँग्रेसका नगर सभापति हरिलाल पाण्डेलगायतले नगरपालिकाले आफ्नो नगर क्षेत्रको सडकमा बुद्धमूर्ति राखेर सिंगो देशलाई नै सन्देश दिन खोजेको भन्दै सकारात्मक कामका लागि नगरबासीहरुको पनि साथ र सहयोग रहने बताउनुभएको थियो ।
सडकको बीचमा दुबैतर्फबाट देखिने गरी राखिने बुद्ध मूर्ति तीन फिट अग्ला हुनेछन् । आगामी बुद्ध पूर्णिमासम्म नगरपालिकाले २२ वटा बुद्धमूर्ति स्थापना गर्नेछ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds