नागरिकता लिनेको घुइँचो

कन्हैयालाल केशरी  

पर्सा, असार ११ गते । जन्मको आधारमा नागरिकता प्राप्त नागरिकका सन्तानलाई वंशजको नागरिकता लिन मार्गप्रशस्त भएपछि जिल्ला प्रशासन कार्यालय पर्सामा घुइँचो लागेको छ । 

कार्यालयले दर्ता प्रक्रियालाई व्यवस्थित र पारदर्शी बनाउन आइतबारदेखि अनलाइन टोकन प्रणाली लागु गरेको छ । 

प्रशासकीय अधिकृत विनय श्रीवास्तवका अनुसार जन्मसिद्ध नागरिकता प्राप्त नागरिकका सन्तानलाई वंशजको आधारमा नेपाली नागरिकता उपलब्ध गराउने सन्दर्भमा नागरिकता वितरणमा सहज, सरल, छिटोछरितो, निष्पक्ष र पारदर्शी गर्न टोकन प्रणाली लागु गरिएको बताउनुभयो । सेवाग्राहीलाई पालो कुर्नुपर्ने झन्झटिलो र सास्ती खेप्नुपर्ने अवस्था अन्त्य गरिएको उहाँले बताउनुभयो । 

कार्यालयले शुक्रबारदेखि निवेदन लिन थालेपछि शुक्रबार मात्रै दुई सय निवेदन दर्ता भएको र दर्ता गराउने सेवाग्राहीको सुची लामो हुँदै जाँदा कार्यालयमा भिडभाड बढ्न गएको बताउँदै उहाँले अन्य सेवाग्राहीलाई मर्का नपर्ने गरी टोकन प्रणाली लागु गरिएको बताउनुभयो ।