प्राधिकरणले कामको जिम्मेवारी हस्तान्तरण गर्ने

गोरखापत्र समाचारदाता

काठमाडौँ मङ्सिर २० गते । राष्ट्रिय  पुनःनिर्माण प्राधिकरणले भूकम्प प्रभावित क्षेत्रका सबै स्थानीयहरूसँग समझदारी गरेर पुनःनिर्माणसम्बन्धी कार्यको जिम्मेवारी हस्तान्तरण गर्ने भएको छ ।
प्राधिकरणको कार्यकारी समितिको बुधबार बसेको बैठकले पुनःनिर्माणको कामलाई छिटो र प्रभावकारी बनाउन सम्बन्धित स्थानीय तहसँग छुट्टाछुट्टै समझदारी गर्ने निर्णय गरेको हो ।
हाल भूकम्पका कारण प्रभावित ३२ जिल्लाका २७२ स्थानीय तहमा पुनःनिर्माणका काम भइरहेका छन् । यसअघि, प्राधिकरणले काभ्रेपलान्चोक जिल्लाका सबै स्थानीय तहसँग छुटाछुट्टै समझदारी गरिसकेको छ ।
बैठकले पुनःनिर्माणको समीक्षा गर्न र स्थानीय तहहरूसँग समझदारी गर्न प्राधिकरणले मङ्सिर २१ गतेदेखि भूकम्प प्रभावित क्षेत्रहरूमा समीक्षा कार्यक्रम र पुनःनिर्माण जिल्ला समन्वय समितिको बैठक आयोजना गर्ने तयारी गरेको प्राधिकरणद्वारा बुधबार जारी विज्ञप्तिमा उल्लेख छ ।
प्राधिकरणले तयार गरेको समझदारीपत्रमा नगरपालिका गाउँपालिकामा इन्जिनियर, सब–इन्जिनियर, असिस्टेन्ट सब–इन्जिनियर र डकर्मी आवश्यकता अनुसार खटाउने, प्राधिकरणबाट खटिएका सबै जनशक्तिलाई पुनःनिर्माणको काममा मात्र खटाउने उनीहरूको हाजिरी राख्ने लगायतका प्रशासनिक क्रियाकलापको जिम्मेवारी नगरपालिका र गाउँपालिकाको हुने उल्लेख छ ।
त्यस्तै गुम्बा, एकीकृत बस्ती, स्थानीय पूर्वाधार जस्ता आयोजनाका लागि तोकिए बमोजिमको बजेट प्राधिकरणले शर्तसहित नगरपालिका र गाउँपालिकालाई उपलब्ध गराउने प्राधिकरणले जनाएको छ ।
समझदारीपत्रमा पुनःनिर्माणको कार्यान्वयनको सिलसिलामा केही जटिल समस्याहरू आइपरेमा प्राधिकरण तथा नगरपालिका र गाउँपालिकाले आपसी समझदारी कायम गरी कार्यान्वयनलाई अगाडि बढाइने लगायतका विषयहरु उल्लेख गरिएको छ ।
निजी आवास निर्माणतर्फ हालसम्म तीन लाख २६ हजार ५१२ भन्दा बढी घर निर्माण भइसकेको र पाँच लाख ६० हजार ७८१ घर निर्माणाधीन अवस्थामा रहेको प्राधिकरणले जनाएको छ । भूकम्पका कारण आठ लाख १२ हजार १६१ भन्दा बढी घर निर्माण गर्नुपर्ने प्राधिकरणको तथ्याङ्कमा उल्लेख छ ।

 

 

 

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds