• १६ चैत २०८०, शुक्रबार

वैशाख २२ गतेबाट रारा गोल्डकप

blog

हिले, वैशाख १९ गते । आउँदो वैशाख २२ गतेबाट अग्नि वसुन्धरा स्मृति १० औँ गोर्खा स्ट्रङ रारा गोल्ड कप फुटबल प्रतियोगिता हुने भएको छ । रारा फुटबल क्लबको आयोजनामा धनकुटाको राजा रानीमा वैशाख २२ देखि २८ गतेसम्म प्रतियोगिता सञ्चालन हुन लागेको हो । 

आयोजक रारा फुटबल क्लबले सोमबार पत्रकार सम्मेलन गरी प्रतियोगिताको बारेमा जानकारी दिएको हो । राजा रानीमा लाग्ने ऐतिहासिक चण्डी पूर्णिमा मेलाको अवसर पारेर हरेक वर्ष रारा गोल्ड कप सञ्चालन हुँदै आइरहेको छ । प्रतियोगितामा आयोजकसहित मोरङको डाँगी हाट यूथ क्लब र पथरी फुटबल क्लब, सुनसरीको ताल तलैया एकेडेमी, झापाको बिर्तामोड युनाइडेट फुटबल क्लब, धनकुटाको डाँडा बजार फुटबल क्लब, सिराहाको शैलेश यूथ क्लब र उदयपुरको गाईघाट फुटबल गरी ८ टिमको सहभागिता रहने रारा क्लबका अध्यक्ष मणि चेम्जोङले जानकारी दिनुभयो । प्रतिगोयताको विजेता टोलीले नगद तीन लाख रुपैयाँ सहित रारा गोल्ड कपको ट्रफी र उपविजेताले एक लाख ५० हजार रुपियाँ हात पार्ने छ।

प्रत्येक खेलमा म्यान अफ दी म्याचको व्यवस्था गरिएको र पाँच हजार पुरस्कार प्रदान गरिने बताइएको छ । विभिन्न विधाहरूमा उत्कृष्ट हुने खेलाडीहरूलाई जनही नगद १० हजार रुपैयाँ ट्रफी र प्रतियोगिताको सर्वोत्कृष्ट खेलाडीलाई नगद २० हजार रुपैयाँ र ट्रफी प्रदान गरिने जनाइएको छ। 

कोरोना महामारीको कारण प्रतियोगिता तीन वर्ष स्थगित भएको थियो। यो संस्करण तीन वर्ष पछि हुन लागेको अध्यक्ष चेम्जोङले बताउनु भयो । प्रतियोगिताको प्रायोजक गोर्खा ब्रोअरी प्रालि, बैङ्किङ पार्टनर नबिल बैङ्क र संरक्षक चौबिसे गाउँपालिका रहेको छ। प्रतियोगिता सञ्चालनका लागि ३६ लाख ५० हजार रुपैयाँ बजेट विनियोजन गरिएको प्रतियोगिताका प्रचारप्रसार संयोजक सविन अधिकारीले बताउनुभयो । 

Author
कविराज घिमिरे

उहाँ धनकुटा हिलेबाट गोरखापत्रका लागि रिपोर्टिङ गर्नुहुन्छ ।