रामेछापका जनप्रतिनिधिको गुनासो: बजेट दिने, कर्मचारी नदिने ?

रामेछाप समाचारदाता

रामेछाप, असोज २५ गते । रामेछाप जिल्लाका जनप्रतिनिधिले कर्मचारीको अभावमा कार्य सम्पादनमा समस्या भएको गुनासो गरेका छन् ।  स्थानीय तहको निर्वाचन भएको एक वर्ष बितिसक्दासमेत कर्मचारी तोकिएको कार्यालयमा नगएपछि सेवाग्राहीलाई सेवा प्रदान र विकास निर्माणका कार्यलाई अगाडि बढाउन समस्या भएको जनप्रतिनिधिको गुनासो छ ।
जिल्लाको दोरम्बा गाउँपालिकामा आयोजना गरिएको एक सार्वजनिक सुनुवाइ कार्यक्रममा कर्मचारीको अभावमा जति काम हुनुपथ्र्यो त्यति हुन नसकेको स्वयम् जनप्रतिनिधिले पनि स्वीकार गरेका छन् ।
गाउँपालिका अध्यक्ष कमानसिंह मोक्तानले आफ्नो गाउँपालिकाको ७ वडामध्ये ३ वटा वडामा मात्रै वडासचिव रहेको र अरू वडाका नागरिकलाई सहज रूपमा सेवा प्रवाह गर्न नसकेको स्वीकार गर्नुभयो ।
सोही गाउँपालिका–२ का वडाध्यक्ष खड्गबहादुर श्रेष्ठले वडा कार्यालयमा खटिएका सचिवले स्वेच्छिक अवकासका लागि निवेदन दिएको तर उहाको राजीनाम स्वीकृत नभएको अवस्थामा उहाँ काममा नआएका तर तलब भने खाइरहेका बताएका छन् ।
वडा अध्यक्षहरू चन्दबहादुर मगर, गङ्गाबहादुर तामाड तथा रेमबहादुर थापाले वडा अध्यक्ष जता जाँदा पनि झोलामै वडा कार्यालयको छाप र लेटरप्याड बोकेर हिँड्नुपर्ने अवस्था भएको गुनासो गरे । गाउँपालिकाका कर्मचारीको अभावका कारण आफ्नो क्षेत्रमा आएको बजेट पनि फ्रिज भएर जाने हो कि भन्ने चिन्ता रहेको उनीहरूले गुनासो गरेका छन् ।
दोरम्बा गाउँपालिकाको आर्थिक वर्ष २०७४÷७५ मा भएको विकास निर्माण र सार्वजनिक सेवा प्रवाहको प्रभाकारिताको विषयमा आयोजित सार्वजनिक सुनुवाई कार्यक्रममा गाउँपालिकाभित्र रहेका सातै वडाका नागरिकले जनप्रतिनिधिलाई विभिन्न प्रश्न गरेका थिए ।
स्थानीय तहको निर्वाचन भएको एक वर्षको अवधिमा स्थानीय तहमा खासै उपलब्धिमूलक काम हुन नसकेको जनताको भनाइ रहेको छ ।
सेवाग्राहीको प्रश्नको उत्तर गाउँपालिकाका अध्यक्ष कमानसिंह मोक्तान, उपाध्यक्ष कृशला घिसिङ, प्रमुख प्रशासकीय अधिकृत विनोद कोइराला र सातै वडाका अध्यक्षले दिएका थिए ।
सार्वजनिक सुनुवाइमा अबको केही दिनभित्रै गाउँपालिकामा बडापत्र टाँस गर्ने, गाउँपालिमा खटाइएका सबै कर्मचारीले आफ्नो कार्यस्थलमा गई नियमित सेवा प्रवाह गर्ने, गाउँपालिका चारवटा बजार केन्द्रमा ०७६ वैशाखसम्म सार्वजनिक शौचालय निर्माणको काम पूरा गरी सञ्चालनमा ल्याउने र यसै आर्थिक वर्षको बजेटबाटै गाउँपालिकाका दलित, महिलालगायतका लक्षित समुदायको उत्थानका लागि कार्यक्रम सञ्चालन गर्ने प्रतिबद्धता जाहेर गरिएको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds