स्वीकृतिबिनै जडीबुटी उत्खनन

जाजरकोट समाचारदाता

खलङ्गा, असोज २५ गते । जिल्ला वन कार्यालयको स्वीकृतिबिना बारेकोट गाउँपालिकाले जडिबुटी उत्खनन कार्यको सुरुवात गरेको छ । जिल्ला वन कार्यालयबाट उत्खननको स्वीकृति नलिई जिल्लाका कुनै ठाउँमा जडिबुटी उत्खनन गर्न नपाउने नियममा रहेता पनि गाउँपालिकाले मनोमानी ढङ्गबाट जडिबुटी उत्खनन सुरु गरेको हो ।
गाउँपालिकाले वन कार्यालयको स्वीकृति नलिई ठेकेदारलाई जडिबुटी उत्खनन गर्न जिम्मा दिएको स्थानीयवासीले बताएका छन् । गाउँपालिकाले प्रत्येक ठेकेदारसँग दुई लाख रुपियाँको दरले पैसा लिँदै जडिबुटी उत्खननको अनुमति दिएको छ, एक स्थानीयले भने, ठेकेदारले जडिबुटी खनेर वन नै रित्तो पारिसके ।
जिल्ला वन कार्यालयले आफ्नो स्वीकृतिबिना जिल्लाका कुनै पनि स्थानीय तहले जडिबुटी उत्खनन गर्न नमिल्ने भए पनि गाउँपालिकाका अध्यक्ष महेन्द्रबहादुर शाहले भने उत्खनन गरिसकेपछि मात्रै स्वीकृति लिने बताउनुभयो ।
उता बारेकोट गाउँपालिकाका प्रमुख शाहले आफ्नो गाउँपालिकाभित्रको सबै स्रोतमा आफ्नो अधिकार भएको बताउनुभयो ।
उहाँले थप्नुभयो, हाम्रो गाउँपालिकामा भएको जडीबुटी उत्खनन गर्ने अधिकार हाम्रो हो, प्रहरी र वन कार्यालयले यहाँ भएको जडीबुटी चोरी निकासी गर्नेलाई रोक लगाउन सकेन ।
त्यसैले हामीले संविधानले दिएको अधिकार प्रयोग गरी जडिबुटी उत्खनन सुरु गरेका हौँ । वन कार्यालयसँगपछि स्वीकृति लिन्छौँ । शाह आफैँले वन कार्यालयको स्वीकृतिबिना नै जडीबुटी उत्खनन गर्न सुरु गरेको स्वीकार गरेका छन् । हामीले हरेक ठेकेदारसँग दुई लाख रुपियाँ धरौटी राखेर जडिबुटी उत्खनन गर्न दिएका हौँ ।
आफ्नो गाउँपालिकामा रहेको स्रोतको उपयोग गर्न कसैको अनुमति लिन नपर्ने दाबी गर्दै शाहले भन्नुभयोे, हामीले खिरौला (वन चिनी) ५६ सय क्वीन्टल उत्खनन गर्न हालै मात्र अनुमति दिएका हौँ । उनीहरूले
एक महिनासम्म जडिबुटी उत्खनन गर्न पाउँछन् ।
उता जिल्ला डिभिजन वन कार्यालयले भने आफ्नो स्वीकृतिबिना कुनै पनि स्थानीय तहले जडिबुटी उत्खनन अनुमति दिने तथा ठेकेदारसँग पैसा असुल्ने गर्न नपाइने जनाएको छ ।
हामीले गाउँपालिकाका अध्यक्षलाई कार्यालयमै बोलाएर त्यसरी जडिबुटी उत्खनन गर्न नहुने सुझाव दिएका छौँ, जिल्ला डिभिजन वन कार्यालयका निमित्त प्रमुख नेपाली शाहले भन्नुभयो, हामीले स्थानीय प्रशासन, प्रहरी र सातबटै स्थानीय तहका जनप्रतिनिधिलाई वन कार्यालयको स्वीकृतिबिना जडिबुटी उत्खनन नगर्न र नगराउन आग्रह गरेका छौँ । स्थानीय तहमा त्यस्तो प्रवृत्ति रोक्न कर्मचारी परिचालन गरेका छौँ, उहाँले भन्नुभयो ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds