भुक्तानी नपाएपछि उपभोक्ता समिति ऋणमा


जनार्जन खत्री

सर्लाही, असोज २४ गते । काम पूरा हुँदा समेत भुक्तानी नपाउँदा सर्लाहीको धुसेनी–झरझरा झोलुङ्गे पुल उपभोक्ता समितिका पदाधिकारी मारमा परेका छन् ।
लालबन्दी नगरपालिका १५, परवानीपुरमा जिल्ला प्राविधिक कार्यालय मलङ्गवा, सर्लाहीले उपभोक्ता समितिमार्फत झरझरा खोलामा झोलुङ्गे पुल निर्माण गरेको हो । पुलबाट स्थानीय बासिन्दा ओहोरदोहार गर्न थालिसकेका छन् । गत साउनमै काम पूरा भए पनि अहिलेसम्म सम्झौतामा उल्लेख भएअनुसार सम्पूर्ण भुक्तानी नपाउँदा उपभोक्ता समितिका पदाधिकारी अप्ठ्यारोमा परेका हुन् ।
पुल निर्माणका लागि ढुङ्गा, गिट्टी, बालुवा ओसार्न प्रयोग गरेको ट्याक्टर र मजदुरहरूलाई उधारोमा काम गराइएको उपभोक्ता समितिकी अध्यक्ष छोइसालमाया घलानले बताउनुभयो । अहिले सबैतिरबाट पैसा माग्न थालेका छन्, घलानले भन्नुभयो, मजदुरले दसैँ खर्च चाहियो भनेर पैसा मागिरहेका छन््, ट्याक्टरवाला र सिमेन्ट ल्याएको हार्डवेयरबाट पनि किचकिच भइरहेको छ ।
झोलुङ्गे पुल उपभोक्ता समितिका कोषाध्यक्ष वीरबहादुर बोम्जनका अनुसार १३ लाखको सम्झौताअनुसार हालसम्म पाँच लाख ६१ हजार पाँच सय ६५ रुपियाँ मात्र भुक्तानी भएको छ । बाँकी सात लाख ३८ हजार चार सय ३५ रुपियाँ माग गर्दा जिल्ला प्राविधिक कार्यालयले कुनै वास्ता नगरेको उपभोक्ता समितिका पदाधिकारीको गुनासो छ । उनीहरूले ऋण गरेर उधारो तिर्ने तयारी गरेका छन् ।
लालबन्दी नगरपालिका १५, परवानीपुरका वडाध्यक्ष गोरखबहादुर बलले उपभोक्ता समितिले पैसा नपाएको बारेमा आफूले पनि केही दिनअघि मात्रै जानकारी पाएको बताउनुभयो । जिल्ला प्राविधिक कार्यालयले, कार्यालय खारेज हुँदैछ भनेर बेलैमा उपभोक्ता समितिलाई भन्नुपथ्र्यो वडाध्यक्ष बलले भन्नुभयो, सोझासीधा रहेका उपभोक्ता समितिका पदाधिकारीले पनि समयमै काम सक्नुभएन, अहिले आएर यस्तो समस्या देखियो ।
जिल्ला प्राविधिक कार्यालय मलङ्गवा, सर्लाहीका सव–इन्जिनियर पे्रमचन्द पाण्डेले कार्यालय खारेज भएकाले झोलुङ्गे पुल निर्माण गरेका उपभोक्तालाई बाँकी रकम दिन नसकिएको बताउनुभयो । उहाँहरूले सम्झौताअनुसार असारमै काम सक्नुभएन, त्यसैले पूरा भुक्तानी हुन नसकेको हो, सव–इन्जिनियर पाण्डेले भन्नुभयो, अब हाम्रो कार्यालयबाट भुक्तानी दिन सक्ने अवस्था छैन् बरु हामी त्यहाँको नगरपालिकालाई भुक्तानीका लागि अनुरोध गर्न सक्छौँ । उहाँका अनुसार अहिले सर्लाही र रौतहट गाभेर (मर्च) नयाँ कार्यालय स्थापनाको तयारी भइरहेको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds