सेजमा दर्ता उद्योगले अझै गरेनन् सम्झौता एक साताभित्र सम्झौता नगरे अनुमति खारेज


लक्ष्मण पौडेल

भैरहवा, भदौ २९ गते । भैरहवास्थित विशेष आर्थिक क्षेत्र (सेज) मा दर्ता भएका उद्योगमध्ये छवटाले तोकिएको अवधिमा भू–बहाल शुल्क नबुझाएपछि विशेष आर्थिक क्षेत्र प्राधिकरणले एक साताभित्र भू–बहाल सम्झौता गर्न अल्टिमेटम दिएको छ । विशेष आर्थिक क्षेत्र प्राधिकरणले बिहीबार सूचना प्रकाशित गर्दै एक साताभित्र भू–बहाल सम्झौता गरी उद्योग स्थापना प्रक्रिया अघि नबढाए उद्योग सञ्चालनको अनुमतिपत्र खारेज गर्ने चेतावनी दिएको छ ।
विशेष आर्थिक क्षेत्र विकास समितिका अनुसार उद्योग सञ्चालनको अनुमति लिएका छ वटा उद्योगले भू–बहाल सम्झौता गरेका छैनन् । भू–बहाल सम्झौता नगर्नेमा एक्सेल गार्मेन्ट प्रोसेसिङ इन्डस्ट्रिज प्रालि, किरण सुज म्यानुफ्याक्चर्स, मिनरल वाटर इन्डस्ट्रिज, एसियन थाई फुड्स प्रालि, श्यामकुमार लोनियाको उद्योग र जगदम्बा सिन्थेटिक प्रालि रहेका छन् ।
तीमध्ये एसियन थाई फुड्सले छवटा प्लटको लागि अनुमति लिएको थियो । प्रालिका सञ्चालक महेशकुमार विदेश भ्रमणमा रहेकाले सम्पर्क हुन सकेन । उद्योगका कानुन अधिकृत गोपालमान भण्डारीले सञ्चालक विदेश गएकाले यसबारेमा आफूले केही भन्न नसक्ने बताउनुभयो ।
किरण सुजले भने पुरानो मेसिन प्लटभित्र लैजान पाउनुपर्ने माग गर्दै निवेदन दिएको थियो तर पुरानो मेसिन र उपकरण लैजान पाउने प्रावधान नभएको र लैजानै परे समितिको सिफरिसका आधारमा मन्त्रिपरिषद्ले निर्णय गर्नुपर्ने अवस्था रहेकोले यो लामो प्रक्रिया लाग्ने विशेष आर्थिक क्षेत्र विकास समितिका सूचना अधिकृत सुन्दर थापाले बताउनुभयो ।
भू–बहाल सम्झौता गर्न बाँकी छ वटा उद्योगले २५ वटा प्लटको अनुमति पाएका थिए । यसका लागि करिब ३० लाख रुपियाँ शुल्क बुझाउनु पर्ने थापाले जानकारी दिनुभयो । हामीले पटकपटक सम्झौताका लागि बोलाउँदा पनि उद्योगी आएनन्, अब सम्झौता नभए अनुमति खारेज गर्नुको विकल्प छैन, थापाले भन्नुभयो ।
यसअघि सेजमा दर्ता भएका १८ उद्योगले छ महिनाको झण्डै ७० लाख रुपियाँ अग्रिम भू–बहाल शुल्क बुझाएका छन् । आउँदो कात्तिकभित्रै उद्योग सञ्चालनमा ल्याउने गरी शक्ति मिनरल्स प्रालिले असारमा उद्योग स्थापना गरेको हो । अरु १७ वटा उद्योगले पनि छ महिनाको अग्रिम भू–बहाल तिरेर उद्योग स्थापना गरेको विशेष आर्थिक क्षेत्र विकास समितिका सूचना अधिकृत थापाले बताउनुभयो ।
मुलुककै पहिलो निर्यातमुखी योजना अन्तर्गत स्थापना भएको सेजमा शक्ति मिनिरल्सले बहालबापत ११ लाख पाँच हजार अग्रिम भुक्तानी तिरेको छ । त्यस्तै एस प्लास्टिक प्रोडक्ट्स निकासी युनिटले ८८ हजार, नुमेटल इन्डस्ट्रिजले १० लाख ७४ हजार, एलईडी लाइट म्यानुफ्याक्चर इन्डस्ट्रिजले एक लाख ४४ हजार रुपियाँ बहाल तिरेका छन् ।
एक्सन पोलिमर्सले एक लाख ४० हजार, सिद्धार्थ पेट प्लास्ट इन्डस्ट्रिजले चार लाख २० हजार, सिद्धार्थ पेट प्लास्ट इन्डस्ट्रिज
(प्रिफर्म क्लोजर्स) ले दुई लाख ८६ हजार, नियर इन्डस्ट्रिज प्रालि (ट्रान्स हिमालय) ले छ लाख ८६ हजार ८२० रुपियाँ बहाल तिरेका छन् । सेजमा स्थापनाको तयारी गरेका ग्रोभेल इन्नोभेसन प्रालिले दुई लाख ६४ हजार, बुद्ध न्याप्किन एन्ड टिस्यु पेपरले दुई लाख ८० हजार, सुगम नानो हर्बल इन्डस्ट्रिजले छ लाख ५३ हजार ७९० रुपियाँ अग्रिम बहाल तिरेका छन् ।
यस्तै चारवटा उद्योग स्थापना गर्ने पञ्चकन्या गु्रप इन्डस्ट्रिजले छ लाख १६ हजार रुपियाँ बहाल तिरेको छ । आईटीएस इलेक्ट्रिकल्स प्रालिले सात लाख ५९ हजार बहाल तिरेको छ भने क्रियसन वल्र्डवाइज प्रालिले एक लाख ६५ हजार तिरेको सेज विकास प्राधिकरणले जनाएको छ । निर्माण भएको डेढ दशकसम्म पनि आवश्यक ऐन र विद्युत् नहुँदा सञ्चालनमा ढिलाइ भएको सेजमा २०७३ मा ऐन बनेपछि र नेपाल विद्युत् प्राधिकरणले आवश्यक विद्युत् उपलब्ध गराउने प्रतिबद्धता जनाएसँगै व्यवसायीले बहाल तिरेर उद्योग निर्माण थालेका हुन् । बहाल तिरेका १७ कम्पनीले छिट्टै उद्योग स्थापना गर्ने जनाएका छन् ।
बढ्दो व्यापार घाटा कम गर्न भन्दै सरकारले १७ वर्ष अघि निर्यातजन्य उद्योग स्थापना गर्ने उद्देश्यले पहिलो सेज भैरहवामा निर्माण गरेको हो ।

 

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds