‘फास्ट ट्रयाक’बाट मौलिक हकका कानुन


गोरखापत्र समाचारदाता

काठमाडौँ, भदौ २९ गते । मौलिक हकसम्बन्धी विधेयक दु्रत मार्ग (फास्ट ट्रयाक)मा पारित गर्न प्रतिनिधिसभाले कार्यसञ्चालन नियमावली निलम्बन गरेको छ ।  राष्ट्रिसभाबाट पारित भई प्रतिनिधिसभामा पेस भएका विधेयकको बाँकी प्रक्रिया छोटो बनाउन नियम निलम्बन गरिएको हो । यस्तै, प्रतिनिधिसभामा बिहीबारमात्र मौलिक हकसम्बन्धी सातवटा विधेयकका प्रतिवेदन पेस भएका छन् । प्रतिवेदन पेससँगै पारित हुने प्रक्रिया पनि सुरु भएको छ ।
नियम निलम्बनका लागि नेपाल कम्युनिस्ट पार्टीका सांसद् खगराज अधिकारीले प्रस्ताव राख्नुभएको थियो । उक्त प्रस्ताव राष्ट्रिय जनता पार्टीका लक्ष्मणलाल कर्णले समर्थन गर्नुभएको थियो । विधेयकमा संशोधन दर्ता गर्न पाउने ७२ घन्टाको समय निलम्बन गरेर १२ घन्टामा झारिएको छ ।  parlament of nepal
राष्ट्रियसभाबाट पारित भएका मौलिक हकसम्बन्धी दुई वटा विधेयक प्रतिनिधिसभामा बिहीबार पेस भएका थिए । बिहीबार नै बसेको प्रतिनिधिसभाको दोस्रो बैठकले विधेयक संशोधनका लागि अनुमोदन गरेको छ । अपाङ्गता भएका व्यक्तिको अधिकार सम्बन्धी विधेयक र वातावरण संरक्षण विधेयक संशोधनका लागि अनुमोदन भएका हुन् । दुबै विधेयक राष्ट्रियसभाबाट पारित भइसकेका छन् । प्रतिनिधिसभाबाट पारित भएपछि प्रमाणीकरणको प्रक्रिया अघि बढ्नेछ ।
सात प्रतिवेदन पेस
यसैबीच मौलिक हक कार्यान्वयनका सात विधेयकको पारित प्रक्रिया सुरु भएको छ । विधेयकमाथिको दफावार छलफलसहितको प्रतिवेदन बिहीबार प्रतिनिधिसभामा पेस भएका छन् । समितिबाट छलफलसहित पारित भएका प्रतिवेदन समितिका ज्येष्ठ सदस्यले पेस गर्नुभएको हो ।
बिहीबार उपभोक्ता संरक्षण विधेयक, रोजगारीको हक सम्बन्धी विधेयक, आवासको हक सम्बन्धी विधेयक, सुरक्षित मातृत्व सम्बन्धी विधेयक पेस भएका हुन् । यस्तै, जनस्वास्थ्य सम्बन्धी विधेयक, खाद्य अधिकार सम्बन्धी विधेयक र भूमि सम्बन्धी विधेयक पेस भएका छन् । पेस भएका प्रतिवेदनसहितका विधेयकमा शुक्रबार सदनमा छलफल हुनेछ ।
शुक्रबार प्रतिनिधिसभाबाट सातैवटा विधेयक पारित गर्ने तयारी छ । प्रतिनिधिसभाबाट पारित भएका विधेयक राष्ट्रियसभामा पेस हुनेछन् । राष्ट्रिसभाबाट पारित भएपछि मात्र प्रमाणीकरणका लागि पठाइनेछ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds