बालिका पन्त हत्या प्रकरण: सिआइवी टोलीमाथि नै छानविन सुरु

देवबहादुर कुँवर

काठमाडौँ, भदौ २९ गते । बलत्कारपछि हत्या गरिएकी कञ्चनपुरकी किशोरी निर्मला पन्तकोे घटनालाई अनुसन्धान गरेको केन्द्रीय अनुसन्धान ब्यूरो (सिआइवी)को टोलीमाथि छानविन गर्न प्रहरी प्रधान कार्यालयले नयाँ समिति गठन गरेको छ ।
समितिको संयोजकमा वरिष्ठ प्रहरी उपरीक्षक (एसएसपी) उत्तम सुवेदीलाई तोकेको छ । सिआईवीका प्रहरी नायव उपरीक्षक (डिएसपी) अङ्गुर जिसी नेतृत्वमा गठन गरिएको विशेष टोलीले पन्त हत्याको छानविन गरेको थियो ।
निर्मला हत्याको अभियोगमा सिआइवीको विशेष टोली र जिल्ला प्रहरी कार्यालय कञ्चनपुरबाट पक्राउ गरिएका दिलिपसिंह विष्टलाई ‘डिएनए’ परीक्षणले दोषी पुष्टि गर्न नसकेपछि प्रहरी प्रधान कार्यालयले डिएसपी जिसीमाथि नै अनुसन्धान गर्न टोली गठन गरेको हो ।
केन्द्रीय प्रहरी प्रवक्ता शैलेश थापाक्षेत्रीले नवगठित पाँच सदस्यीय छानविन समितिले प्रहरी अनुसन्धानमा भएका लापरवाही र कमी कमजोरीको छानविन हुने बताउनुभयो । ‘यो टोलीले घटनाको विस्तृत छानविन नभई सिआइवी टोलीले गरेका कमी कमजोरीको अनुसन्धान गर्ने प्रवक्ता क्षेत्रीले जानकारी दिनुभयो ।
बलत्कारपछि भएको हत्या घट्नाको छानविन गर्नका लागि ‘सिआइवीका एसएसपी ठाकुरप्रसाद ज्ञवालीको कमाण्डमा अनुसन्धान टोली घटनास्थलमा नै परिचालित छ । एसएसपी सुवेदीको नेतृत्वमा गठित छानविन टोलीले जिल्ला प्रहरी कार्यालयका तत्कालिन प्रमुख दिल्लीसिंह विष्ट, डिएसपी ज्ञानबहादुर सेठ्ठी, मुद्धा शाखाका प्रहरी निरीक्षक एकिन्द्र खड्कामाथि समेत छानविन गर्ने छ ।
टोलीले दिएको प्रतिवेदनअनुसार उनीहरुलाई थप कारवाही अगाडि बढाइने प्रवक्ता क्षेत्रीले जानकारी दिनुभयो । निलम्वीत एसपी विष्ट, डिएसपीद्वय जिसी तथा सेठ्ठी तथा प्रहरी निरीक्षक खड्काले निर्मला हत्या घटनाको अनुसन्धानलाई प्रभावित पार्ने गरी मानसिक रूपले अस्वस्थ दिलिपसिंहलाई पक्राउ गरेको हुनसक्ने आशंका प्रहरी प्रधान कार्यालयको छ ।
निर्मला हत्याकाण्डको अनुसन्धानमा गम्भीर त्रुटि गर्नुका साथै हेलचेक्रयाइ र लापरवाही गरेको भन्दै एसपी विष्टलाई निलम्वन गरिएको छ । सिआइवीका डिएसपी जिसी र मुद्धा प्रमुख प्रहरी निरीक्षक एकीन्द्र खड्कालाई निगरानीमा राखिएको छ ।
उक्त घटनाको अनुसन्धानमा सिआइवी प्रहरीले गरेको लापरवाहीका कारण नेपाल प्रहरीप्रति जनविश्वास गुम्ने खतरा बढेको भन्दै प्रहरी संगठनभित्रैबाट सम्वद्ध प्रहरी अधिकारीलाई कडा कारवाहीको माग हुन थालेको छ ।
यसैबीच, निर्मला हत्या घटना दिनप्रति दिन रहस्मय बन्दै गएपछि निलम्बित एसपी डिल्लीसिंह विष्ट, उनका छोरा किरण विष्ट र आयुष विष्टको पनि डिएनए परीक्षण हुने भएको छ । यसका लागि महाराजगञ्जस्थित शिक्षण अस्पतालमा रहेको प्रयोगशाला (फरेन्सिक ल्याव )मा डिएनए परीक्षण हुने छ ।
नेपाल प्रहरीको विधिविज्ञान प्रयोगशालाले पनि डिएनए परीक्षण गर्ने गरेको छ । शिक्षण अस्पतालका विज्ञ चिकित्सकको नेतृत्वमा उनीहरुको डिएनए परीक्षण हुन लागेको प्रहरी प्रधान कार्यालयले जानकारी दिएको छ ।
बालिका पन्तको रहस्मय हत्या घटनाको छानविन गर्न सहसचिव हरिप्रसाद मैनालीको संयोजकत्वमा गठित उच्चस्तरिय छानविन समितिका सदस्य सशस्त्र प्रहरी वलका डिआइजी वसन्त बानियाँलाई हृदयघात भएको छ ।
घटनाको छानविन गर्ने क्रममा महेन्द्रनगरमा खटिएका बानियाँलाई छ दिनअघि एक्कासी हृदयघात भएको थियो । सशस्त्र प्रहरी वलका अनुसार उहाँको राजधानीको एक अस्पतालमा उपचार भइरहेको छ ।
यसअघि सोही समितिका सदस्य एवं उपसचिव वीरेन्द्र केसीले शान्तिसुरक्षाको माग गर्दै समितिबाट राजीनामा दिएको बताए पनि बुधवार गृहमन्त्री रामबहादुर थापा र सचिव प्रेमकुमार राईसंँगको छलफल पछि पुनःसमितिमा फर्किनु भएको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds