भेडापालनमा आकर्षण बढ्दो


नेत्र शाही

धौलीघाट, भदौ २८ गते । जुम्लामा भेडा पालनमा आकर्षण बढेको छ । मासुको बजार प्रशस्त भएपछि युवा भेडापालनमा आकर्षित भएका हुन् । जुम्लाका विभिन्न गाउँका युवाले भेडा पालन सुरु गरिएपछि जुम्लाका पाटनहरूमा भेडा बाख्राहरू भरिभराउ देखिन्छन् ।
जुम्ला सिंजा गाउँपालिका वडा ६ भाडगाउँका २२ वर्षीय युवा रमेश रावत अहिले कक्षा १२ को पढाइ सकेर पाटनमा भेडा पालन गरि रहनुभएको छ । करिब चार हजार मिटर उचाइ रहेको गोठीचौर गाउँपालिकाको धौलीघाट पाटनमा एक सय पचास भेडा चराउन उहाँ व्यस्त हुनुहुन्छ । रमेशले कक्षा १२ सकेर घरपरिवारलाई सघाउन भेडा चराउन लेकमा आएको बताउनुभयो । उहाँले बर्सेनि ५० भेडा करिब पाँच देखि छ लाख रुपियाँको भेडा बिक्री हुने गरेको हुँदा घरधन्दा पढाइसमेत सजिलो भएको बताउनुभयो । veda
चन्दननाथ नगरपालिका वडा ९ तलिउमका चन्द्रबहादुर रावलले अन्य व्यवसायभन्दा भेडा पालनबाट मनग्य आम्दानी भएको बताउनुभयो । धौलीघाट पाटनमा चन्द्रबहादुरका १२० भेडा छन् र दसैँको समयमा ४० देखि ५० भेडा बिक्री हुने गरेको उहाँले बताउनुभयो । उहाँले पनि भेडापालनबाट वार्षिक पाँचदेखि छ लाख रुपियाँ आम्दानी हुने गरेको बताउनुभयो ।
जुम्लाको गोठीचौर गाउँपालिका धौलीघाट, चौधरी भिटा, साना हाँका, ठूला हाँका, विष्ट ज्यू, कनका सुन्दरीका विभिन्न पाटनमा अहिले १५ देखि २० हजार भेडा छन् । बर्खायाममा पाटन क्षेत्रमा भेडासमेत भएकाले निकै रमाइलो हुने गर्दछ ।
जिल्ला पशुसेवा कार्यालय जुम्लाको तथ्याङ्क अनुसार आर्थिक वर्ष २०७४÷७५ मा जुम्लामा दुई लाख १८ हजार ७३३ भेडा र बाख्रा छन् । जसमा थुमा, भेडा, पाठा र पाठी गरेर एक लाख ४९ हजार ४६९ र बाख्रा र खसी ६९ हजार ३०४ रहेका चन्दननाथ नगरपालिकाका पशु विकास अधिकृत ज्ञानेन्द्र बुढ्थापाले जानकारी दिनुभये ।
हिमाली क्षेत्रमा पालन हुने यहाँको भेडाको मासु निकै स्वादिलो हुन्छ । चिसो मौसममा सङ्घर्ष गरेर बाँचेको भेडा र खसीको मासु यहाँबाट बाहिरसमेत निर्यात हुने गरेको छ । यहाँको मासु आफन्तले काठमाडौँ नेपालगञ्जसमेत नासोका रूपमा लिने गर्दछन् । बूढापाका र सुत्केरीलाई भेडाको मासु औषधिको हुनेसमेत विश्वास छ ।
पछिल्लो समयमा भेडा बाख्रापालनमा भने निकै आकर्षण बढेको छ । जिल्लामा करिब ५० जनाभन्दा बढी व्यावसायिक अब्बल किसान रहेका छन् । अबको स्थानीय सरकारले पनि यो विषयमा प्राथामिकता दिनुपर्ने भेडापालक किसानको माग रहेको छ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds