चीनसँग उडान अनुमति खोज्दै नेपाल


गोरखापत्र समाचारदाता

काठमाडौँ, भदौ २७ गते । नेपाललाई सीधा उडान अनुमति उपलब्ध गराउन चीनको सिचुआन प्रान्तको राजधानी छेन्दु सकारात्मक देखिएको छ । सिचुआनमा आयोजित अन्तर्राष्ट्रिय पर्यटन महोत्सवका क्रममा संस्कृति, पर्यटन तथा नागरिक उड्ययनमन्त्री रवीन्द्र अधिकारी र छेन्दुका गभर्नरबीच भएको भेटमा दोहोरो उडानलाई सम्भव बनाउने विषयमा छलफल भएको थियो ।
नेपाललाई स्लट उपलब्ध गराउन छेन्दुका गनर्भरसँग कुराकानी भएको छ, मङ्गलबार भ्रमणपछिको जानकारी गराउँदै मन्त्री अधिकारीले भन्नुभयो, यस विषयमा सकारात्मक प्रगति भएको छ । चीनका विमान कम्पनीले नेपालमा नियमित उडान गर्दै आए पनि स्लट अभावमा नेपाली उडान कम्पनीले आफ्नो सेवा चीनमा विस्तार गर्न सकेका छैनन् । nepal airlines
नेपाली ध्वजाबाहकसहित अन्य विमान कम्पनीले पनि उडान गर्न पाउने विषयमा बारम्बार दुई देशबीच छलफल हुँदै आएको छ । प्रधानमन्त्री र परराष्ट्र मन्त्री चीन भ्रमणका क्रममा पनि यो विषयले प्रवेश पाए पनि अहिलेसम्म ठोस प्रगति भने हुन सकेको छैन । सरकारले यसलाई कूटनीतिक रूपमै अघि सार्ने मन्त्री अधिकारीले बताउनुभयो । व्यापारलाई समान मान्ने हो भने उडानमा पनि समान हुनुपर्ने उहाँले बताउनुभयो ।
सरकारले छेन्दुबाहेक चीनका अन्य सहर र प्रान्तमा पनि उडानका लागि प्रयत्न गर्ने मन्त्री अधिकारीले जानकारी दिनुभयो । चीनको राजधानी बेइजिङमा निर्माण हुँदै गरेको अर्को विमानस्थल ११ महिनापछि पूरा हुने र नेपालले त्यसमा स्लट पाउने सम्भावना रहेको पनि उहाँले जानकारी दिनुभयो । सरकारले सन् २०२० लाई भ्रमण वर्ष घोषणा गरेको सन्दर्भमा चीनबाट पर्यटक भित्र्याउन नेपाली उडान कम्पनीलाई अनुमति आवश्यक रहने उहाँले बताउनुभयो ।
त्यस्तै सिचुआनकै लसान सहरका गभर्नरसँगको छलफलमा सीधा लुम्बिनी उडान गर्न सक्ने विषयमा पनि छलफल भएको उहाँले जानकारी दिनुभयो । विश्वकै अग्लो बुद्धमूर्ति भएको सहरका रूपमा परिचित लसान र लुम्बिनीलाई जोडेर पर्यटन प्रवद्र्धन गर्ने विषयमा पनि समझदारी भएको उहाँले जानकारी दिनुभयो ।
नेपाली जहाज चीन जान सक्ने अवस्था नरहेसम्म त्यसलाई समान मान्न सक्ने अवस्था नरहेको पनि मन्त्री अधिकारीको भनाइ थियो । आवतजावत नै सजिलो बनाउन पनि नेपालले चीनमा उडान गर्न आवश्यक रहेको उहाँले बताउनुभयो । चीनको लसान सहरले गौतम बुद्धको जन्मस्थलका रूपमा नेपाललाई ‘कन्ट्री अफ अनर’का रूपमा यही भदौ २१ देखि २४ गतेसम्म जारी अन्तर्राष्ट्रिय पर्यटन महोत्सवमा आमन्त्रण गरेको थियो । सो क्रममा नेपालका लुम्बिनी सांस्कृति, रामग्राम र तानसेन नगरपालिकाका मेयरले लसान सहरका मेयरसँग पर्यटन प्रवद्र्धनको समझदारी पत्रमा हस्ताक्षर गर्नुभएको थियो ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds