जोखिमयुक्त बस्ती धमाधम स्थानान्तरण हुँदै

हेमनाथ खतिवडा

रसुवा, साउन २४ गते । रसुवामा विनाशकारी भूकम्पपछि जोखिमयुक्त भनिएका बस्ती धमाधम सुरक्षित ठाउँमा स्थानान्तरण गरिएको छ । एक सयभन्दा बढी परिवारले सुरक्षित स्थानमा घर बनाउन सुरु
गरेका छन् ।  सरकारले दुई लाख रुपियाँका दरले रकम उपलब्ध गराएपछि अहिले ३५७ परिवारले जग्गा खरिद गरेका छन् । नुवाकोटको सातदोबाटेमा आठ घर निर्माणाधीन छन् भने खोलेबेँसीमा २८ घर निर्माण भएको छ ।
थुमनमा–८, नौकुण्डको पाच्र्याङ र दोक्लाङमा १२ घर, कालिका गाउँपालिकाको गोम्बोडाँडामा पाँच घर, धारापानीमा दुई घर, उत्तरगया गाउँपालिकाको नौबिसेमा १६ घर र बोगटीटारमा ११ घर निर्माणाधीन अवस्थामा छन् ।
आत्मनिर्भर केन्द्रका विश्वास नेपालीले उत्तरगया गाउँपालिकामा ४७० लाभग्राही रहेकोमा १८२ परिवारले जग्गा पाएको बताउनुभयो । कालिकामा २६ मा १४, नौकुण्डमा १२६ मा १९, आमाछोदिङमोमा २०२ मा १२४ र गोसाइँकुण्ड गाउँपालिकामा २० मा १३ परिवार गरी ८४४ लाभग्राहीमध्ये ३५७ परिवारले सरकारले उपलब्ध गराएको रकमबाट जग्गा  लिएको बताउनुभयो ।
राष्ट्रिय पुनःनिर्माण प्राधिकरण जिल्ला अनुदान व्यवस्थापन स्थानीय पूर्वाधार प्रमुख कृष्णकान्त उपाध्यायका अनुसार ‘दिगो समाधान’ कार्यक्रममार्फत जिल्ला भूमिअधिकार मञ्च, पिन संस्थासँगको समन्वयमा काम भइरहेको छ ।
डाँडागाउँबाट विस्थापित बोगटीटारमा जस्ताका टहरामा बस्दै आएका २८ परिवारले मिलेर खोलेबेँसीमा घर निर्माण गरिरहेको स्थानीय दिलबहादुर तामाङले बताउनुभयो । अहिले सबैजनालाई घर बनाउन चटारो छ, उहाँले भन्नुभयो ।
लाभग्राही सूचीमा नाम समावेश गर्न छुटेका विस्थापित २५० परिवार अझै समस्यामा छन् । विस्थापितहरूले भने तीन वर्ष बितिसक्दा पनि सुरक्षित आवास नभएको गुनासो गरेका छन् । स्थानीय महिला स्वास्थ्य स्वयंसेविका बुटी तामाङका अनुसार खाल्टे क्याम्पमा अझ २६० परिवार टहरामा बसिरहेका छन् ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds