कटुवाल दहबाट घैलामा दिल देवता ल्याइने

सरोज आचार्य

ललितपुर, असार २७ गते । कटुवाल दहमा दिल देवता ल्याउने दिन असार २९ गते औँसीका दिन परेको छ । यो वर्षको रातो मच्छिन्द्रनाथको जात्रा समापनसँगै नाथमा दिलको प्रविष्ठ गराउनुपर्ने भएकाले कटुवाल दहबाट दिल देवता ल्याउनुपरेको हो ।
रातो मच्छिन्द्रनाथका पानेजु पुजारी मालिनी भनिने महिला रकमी कर्मचारी र गुठी संस्थानका कर्मचारी पैदलै गएर रातभर जाग्राम वसी कटुवाल दहबाट घैलामा दिल देवता ल्याउने प्रचलन छ ।
गुठी संस्थानकी वरिष्ठ लेखा सहायक उमा अर्यालका अनुसार दिल देवता लिन जाने व्यक्ति मालिनीले नयाँ वस्त्र साथ शुद्ध चोखो भएर दहमा जाने चलन छ ।
नाथको कोइना पूजा सम्पन्न भएपछि बुङ्गमतीको यावत खेत खलियानमा रोपाइँ सम्पन्न गर्दै गराउँदै यो वर्षको मच्छिन्द्रनाथको साथमा रहेको भोटो देखाउने जात्रा र रथयात्रा सकिएको थियो ।
आगामी वर्षका लागि यात्रा गराउँदा र यसअघि मन्दिरमै रहँदा नाथमा दिल प्रविष्ठ गराउनुपर्ने भएकाले दिल देवतालाई कटुवाल दहबाट ल्याउन लागिएको हो । कर्कोटक नागको वासस्थान कटुवाल दह र स्वयं मच्छिन्द्रनाथको प्रसङ्ग पानीसँग जोडिएको छ । नाथलाई वर्षा र सहकालका देवता मानिन्छ ।
गुठी संस्थान पाटन तःवहाल शाखा प्रमुख शैलेन्द्र पौडेलका अनुसार सुवाल, गुभाजु, मालिनी र यजमान सहितको २५ जनाको टोलीलाई दिल देवता ल्याउन खटाइएको छ । मालिनी र गुभाजुले देवतालाई घैलामा राखेर असार ३० गते बुङ्गमती ल्याई मच्छिन्द्रनाथमा प्रविष्ठ गराउनेछन् । दिल राखिएपछि नाथ दर्शन योग्य हुनुहुनेछ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds