विमानस्थलको सुधार आवश्यक (सम्पादकीय)


सन् २०२० सम्म वार्षिक २० लाख विदेशी पर्यटक भिœयाउने लक्ष्यका साथ पर्यटन वर्ष मनाउने तयारी चलिरहेको छ । सरकारले पर्याप्त सम्भावना रहे पनि उपयोग हुन नसकेको अवस्थामा रहेका पर्यटन विकास र प्रवद्र्धनलाई जोड दिइएको छ । कुल गार्हस्थ उत्पादनमा अत्यन्तै न्यून २.३ प्रतिशत योगदान दिइरहेको र प्रत्यक्ष तथा परोक्ष रुपमा १० लाख जनालाई रोजगारी दिइरहेको पर्यटन क्षेत्रको विकास गरेर अर्थतन्त्रमा यसको योगदान वृद्धि गर्ने लक्ष्यसाथ सरकार अगाडि बढेको छ । यो लक्ष्य हासिल गर्न र भ्रमण वर्ष सफल बनाउन हालको भन्दा दोब्बर सङ्ख्यामा भित्रिने विदेशी पर्यटकका लागि आवश्यक पर्ने पूर्वाधार निर्माणतर्फ सरकार र निजी क्षेत्रको ध्यान गएको छ ।
वार्षिक २० लाख पर्यटक भिœयाउन आन्तरिक र बाह्य क्षेत्रमा ठूलै तयारी आवश्यक छ । बाह्य क्षेत्रमा नेपालको पर्यटन प्रवद्र्धन गर्दै धेरैभन्दा धेरै विदेशीलाई नेपाल आउन आकर्षण गर्नुपर्छ भने विदेशीलाई भ्रमणको निम्तोसँगै नेपालमा उनीहरुको आतिथ्यको पनि चाहिंदो तयारी गर्नुपर्छ । पर्यटकको खानपान, बस्ने र घुम्न जानका लागि आवश्यक तयारी गर्नुपर्छ । निजी क्षेत्रको राम्रै लगानी रहेका कारण खाना, बासस्थान र यात्रा व्यवस्थापनमा समस्या नआउनसक्छ । हाल १२५ भन्दा बढी तारे होटल र एक हजार जति अन्य पर्यटक स्तरका होटलमा गरी ४० हजार जति शय्या छन् । यसबाहेक पनि अढाइ सयजति सामुदायिक होम स्टे विकास भइसकेका छन् । आन्तरिक यातायातको अवस्था कमजोर छ । सडक मार्गको अवस्था त्यति राम्रो छैन भने हवाइ यात्राका लागि पर्याप्त उडान र विमानस्थल छैनन् । आन्तरिक उडान गर्ने २० वायु सेवा कम्पनी छन् । आवश्यक परे निजीक्षेत्रले थप लगानी गर्न सक्षम छन् । तर तीन दर्जन विमानस्थल रहे पनि सबै मौसममा उडान हुनसक्ने विमानस्थल ३० जति मात्र छन् । सबभन्दा चुनौतीपूर्ण अवस्था पर्यटकलाई कसरी सहज रुपमा भिœयाउने भन्ने नै हो । नेपाली तीनसहित ३० वटा वायुसेवा कम्पनीले अन्तर्राष्ट्रिय उडान गर्छन् । अहिले दुईवटा एयरबस र एउटा बोइङबाट आठ स्थानमा अन्तर्राष्ट्रिय उडान गरिरहेको निगमसँग डेढ महिनापछि दुईवटा एयरबस, दुईवटा वाइडबडी र एउटा बोइङ जहाज हुनेछन् । थप दुईवटा एयरबस भिœयाउने तयारीमा छ । यसले पर्यटक भिœयाउन सहयोग गरे पनि पर्याप्त नहुनसक्छ । सबभन्दा जटिल समस्या विमानस्थलको छ । एकमात्र अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थलबाट अहिले नै वार्षिक करिव ३२ लाख यात्रु यही विमानस्थलबाट आवतजावत गर्छन् । अहिलेकै अवस्थामा अरु थप भार वहन गर्नसक्ने अवस्थामा त्रिभुवन विमानस्थलमा छैन । क्षेत्रीय अन्तर्राष्ट्रिय विमानस्थलका रुपमा स्तरोन्नति गरिँदै गरेको गौतमबुद्ध विमानस्थलको करिव आधा काम सकिएको छ । २०१८ को जुलाईमा काम सम्पन्न हुनेगरी सम्झौता भए पनि चिनिया ठेकेदार कम्पनीलाई दोस्रोपटक एक वर्ष थप गरिएको छ । पोखरा विमानस्थलको १५ प्रतिशत काम भएको छ र सन् २०१९ भित्र धावनमार्ग निर्माण र २०२१ सम्म सम्पूर्ण काम सम्पन्न गर्ने लक्ष्य छ । दोस्रो अन्तर्राष्ट्रिय विमानस्थलका रुपमा निर्माण गर्न लागिएको निजगढ विमानस्थल निर्माणको प्ररम्भिक चरणमै छ ।
पर्यटन क्षेत्रको प्रवद्र्धन र विकास गरेर अर्थतन्त्रको महत्वपूर्ण क्षेत्रका रुपमा विकास गर्न पर्यटन भौतिक पूर्वाधारमा अझै धेरै लगानी गर्न आवश्यक छ । अहिले समस्याका रुपमा रहेका अन्तर्राष्ट्रिय उडानतर्फका चुनौती समाधान गर्न सरकारको ध्यान जानुपर्छ । पर्यटक भिœयाउन विदेशी विमान सेवा कम्पनीमाथि भर पर्नुभन्दा स्वदेशी विमानलाई प्रोत्साहन गर्नुपर्छ । यसका लागि राष्ट्रिय ध्वजावाहक नेपाल वायुसेवा निगमको क्षमता बढाउनुपर्छ । यसबाहेक तत्कालका लागि त्रिभुवन अन्तर्राष्ट्रिय विमानस्थलको सुदृढीकरण गरी अझ धेरै विमान र यात्रु व्यवस्थापन गर्नसक्ने बनाउनुको विकल्प छैन । छ वर्षदेखि चलिरहेको तर सन्तोषजनक प्रगति हासिल गर्न नसकेको त्रिभुवन अन्तर्राष्ट्रिय विमानस्थलको सुधारलाई तीव्रता दिनुपर्छ । यसका साथसाथै, निर्माणाधीन गौतमबुद्ध, पोखरा र निजगढ अन्तर्राष्ट्रिय विमानस्थललाई चाँडै सम्पन्न गरी यी विमान स्थलबाट अन्तर्राष्ट्रिय उडान नगरेसम्म समस्या समाधान हुँदैन ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds