अब पुरुषलाई पनि नर्स बन्ने अवसर !

काठमाडौ, असार ११ गते । नेपालमा अब पुरुषहरुले पनि नर्स बन्न पाउने भएका छन् । नेपाल नर्सिङ्ग काउन्सिलले अब नर्स अध्ययन हुने विश्वविद्यालय, सीटीईभीटी अन्तर्गतका सम्र्पूण कलेजमा आर्थिक वर्ष २०७५÷०७६ देखि पुरुषलाई पनि नर्स बन्ने अवसर दिएको हो ।
काउन्सिलले आगामी आर्थिक वर्षदेखि नर्सिङ अध्ययन हुने सम्र्पूण कलेजमा १५ प्रतिशत पुरुषलाई अध्यापन गराउनैपर्ने व्यवस्था गरेको छ । काउन्सिलकी रजिष्ट्रार लक्ष्मी राइले भन्नुभयो, “नर्सिङ्ग अध्ययन हुने जुनसुकै कलेजले पनि कुल विद्यार्थीमध्ये १५ प्रतिशत पुरुषलाई अनिवार्य रुपमा नर्सिङ विषय अध्यापन गराउनै पर्नेछ ।”
‘काउन्सिलको असार ५ गतेको बैठकले पुरुषलाई अनिवार्य १५ प्रतिशत कोटा छुट्याउने निर्णय गरेको हो’, राईले भन्नुभयो, “अब नर्सिङ्ग अध्ययन हुने विश्वविद्यालय, प्रतिष्ठान, प्राविधिक शिक्षा तथा व्यावसायिक तालिम परिषद अन्तर्गतका सबै कलेजलाई नर्सिङ् परिषद्ले जानकारी गराइसकेको छ ।”
नर्सिङ्ग काउन्सिलको निर्णयसँगै नर्सिङ कलेजले कुल विद्यार्थीमध्ये १५ प्रतिशत पुरुषलाई भर्ना गर्न पाउनेछन । काउन्सिलका अनुसार हाल नेपालमा १२० कलेजमा नर्सिङ अध्यापन भइरहेको छ । २५ वर्ष अगाडिसम्म नेपालमा पुरुष नर्स उत्पादन हुने गर्दथे । तीमध्ये केही पुरुष नर्स नेपालमा अझै कार्यरत रहेका छन् । २५ वर्ष अगाडि भने १० प्रतिशत पुरुषलाई नर्सिङ अध्ययन गर्न कोटा छुट्याइएको थियो । पुरुषको नर्सिङप्रतिको आकर्षण घट्न थालेपछि पुरुषको कोटा बन्द गरिएको थियो ।
नेपाल नर्सिङ संघकी अध्यक्ष तारा पोखरेलले अरु देशमा पुरुष नर्स हुने भएकाले नेपालमा पनि पुरुष नर्सको आवश्यकता हुनुपर्ने माग उठाउँदै आएको जानकारी दिनुभयो । नर्सिङ काउन्सिलको पछिल्लो तथ्याङ्कअनुसार हाल नेपालमा ८१ हजार आठसय नर्स रहेका छन् ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds