ढुङ्गाको पूजा गर्दागर्दै
मानिस आफैँ ढुङ्गा भइरहेछ
फरक यत्ति हो, ढुङ्गा बोल्दैन
मानिस बोल्छ, अति बोल्छ, जे पनि बोल्छ ।
मानिस ढुङ्गा जस्तै कठोर हुँदैछ
मानिस ढुङ्गा जस्तै गह्रौँ बन्दैछ
एउटा ढुङ्गा बन्न शदियौँ लाग्छ
तर मानिस दुईचार वर्षमै
मानिसबाट ढुङ्गामा परिणत भइदिन्छ ।
मानिसलाई कहिले पदले ढुङ्गा बनाइदिन्छ
उसलाई कहिले पैसाले ढुङ्गा बनाइदिन्छ
ऊ कहिले सबथोक गुमाएर ढुङ्गा बन्न पुग्छ
कहिले ऊ धेरैथोक कब्जा गरेर ढुङ्गा बनिदिन्छ ।
कहिले मानिसले प्रेमको नाममा ढुङ्गाको रूप लिन्छ
मानिस कहिले घृणाको चरममा पुगेर ढुङ्गा भइदिन्छ
आखिर जसरी पनि मानिस ढुङ्गा बन्नमै व्यस्त रहेको छ ।
वनस्थली, काठमाडौं
