गद्दी बैठक भोगचलनमा आउने

सरोज आचार्य

काठमाडौँ, असार १० गते । वसन्तपुरस्थित गद्दी बैठक लामो समयपछि हनुमानढोका दरवार हेरचाह अड्डाको भोगचलनमा आउने भएको छ । सक्रिय शाही शासनकालका वेला गद्दी वैठक राजकीय सम्पत्ति कोष ढुकुटी विभाग अन्तर्गत तत्कालीन नारायणहिटी राजदरवारको अधिनमा थियो ।
तत्कालीन प्रधानमन्त्री गिरिजाप्रसाद कोइराला प्रधानमन्त्री रहँदा हनुमानढोका दरवारले चर्चेको साढे ४२ रोपनी जग्गा र यहाँ रहेको हनुमानढोका दरवारलाई पुरातत्व विभाग हनुमानढोका दरवार हेरचाह अड्डा मातहत ल्याइएको भए पनि गद्दी वैठक भने अड्डा मातहत आउनसकेको थिएन ।
हनुमानढोका दरवार हेरचाह अड्डाको नाममा यही साढे ४२ रोपनी जग्गामा यो गद्दी वैठकपनि रहेको भएपनि वैठकलाई गृह मन्त्रालय अन्तर्गत समारोह प्रवन्ध फाँट कार्यालयले प्रयोगमा ल्याउँदै आएको थियो ।
शाही शासनकालको अन्त्यपछि समारोह प्रवन्ध फाँट निष्क्रिय हुँदै गए पनि फाँटले छेवैको फरासखानाको एउटा कोठा भने ओगटिरहेको थियो । यही कोठाबाट इन्द्रजात्राको बेला कुमारी रथयात्राको समारोहका लागि मात्र वर्षको एकपटक फाँटले गद्दी बैठक खोल्ने गरेको थियो । Basntapur  Durbar Gaddi baithak _ rajendra
दरवार हेरचाह अड्डा प्रमुख अरुणा नकर्मीका अनुसार गद्दी वैठकको सवलकीरण मार्फत् निर्माण सम्पन्न भई गद्दी वैठक नेपाल सरकारलाई हस्तान्तरण भएपछि वैठक अड्डा मातहत आउने भएको छ । यही असार १३ गते अमेरिकी सरकारबाट नेपाल सरकारलाई गद्दी वैठक हस्तान्तरण गर्ने कार्यक्रम रहेको छ । अमेरिकी सरकारबाट वैठकको सवलीकरण भइरहेको छ ।
‘अड्डा मातहत वैठक आएपछि यसलाई हनुमान ढोकाका अन्य सम्पदा अवलोकनका लागि खुला गरे जस्तै वा के कसरी सञ्चालन गर्ने भन्ने विषयपछि नै निक्र्योल हुन्छ’, प्रमुख नकर्मी भन्नुहुन्छ ।
अमेरिकी एम्वेसडर फन्डले भूकम्पले भत्काएको गद्दी वैठकको सवलीकरणमार्फत निर्माण सम्पन्न गर्दैछ । वैठकको पश्चिम र दक्षिण मोहडा पूर्णरूपमा निर्माण सकिएको छ । राणा प्रधानमन्त्री चन्द्रशम्शेरले बेलायतबाट फर्केपछि उतैको शैलीमा गद्दी वैठक बनाएका थिए ।
त्यसवेलादेखि राजकीय कुटनीतिक भेटघाट यहाँ हुनेगरेको थियो भने शाही परिवारले इन्द्रजात्राका वेला यो वैठक पछिसम्म प्रयोग गर्दै आएका थिए । दरवारका पुराना कर्मचारी मिठाराम पुडासैनीका अनुसार गद्दी वैठकबाहेक यससँग जोडिएका सवै भौतिक सम्पदा पुरातत्व विभाग मातहत आइसकेको छ । यहाँका पसल कवलका वहाल र अन्य आयस्ता राजस्व दाखिला हुने व्यवस्था भइसकेको छ ।

 

थप समाचार
प्रतिकृया
नाम

ईमेल

ठेगना