शेरबहादुर राई
ओखलढुङ्गा, फागुन १५ गते । आइतबार साँझ वर्षासँगै परेको चट्याङ लागेर पाँच महिनाकी गर्भवती महिला गम्भीर घाइते हुनुभएको छ । खिजिदेम्बा गाउँपालिका –७ रावादोलुकी २१ वर्षीय प्रमिला बस्नेत (ढुङ्गेल) चट्याङ लागेर घाइते हुनुभएको हो ।
ढुङ्गेलकी १५ वर्षीय बहिनी निसिता बस्नेत पनि चट्याङ लागेर घाइते हुनुभएको छ । घाइतेको स्थानीय स्वास्थ्य चौकीमा उपचार सम्भव नभएपछि थप उपचारका लागि एम्बुलेन्समार्फत काठमाडौं पठाइएको जिल्ला प्रहरी कार्यालय ओखलढुङ्गाका प्रहरी निरीक्षक देवेन्द्र दासले बताउनुभयो ।
घाइतेमध्ये ढुङ्गेलको अवस्था गम्भीर रहेको प्रहरी निरीक्षक दासको भनाइ छ । उहाँको दुवै खुट्टा जलेको र बोल्न नसक्ने अवस्था रहेको प्रहरी निरीक्षक दासले जानकारी दिनुभयो । निसिताको अवस्था सामान्य रहेको प्रहरीको भनाइ छ ।
