ऐतिहासिक कदम (सम्पादकीय)

 



नेपाल कम्युनिस्ट पार्टी (एमाले) र नेपाल कम्युनिस्ट पार्टी (माओवादी केन्द्र) बीच एकीकरण भएर बिहीबार नेपाल कम्युनिस्ट पार्टी बनेको छ । एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल (प्रचण्ड)ले बुधबार गर्नुभएको पार्टी एकीकरणसम्बन्धी सहमति अनुरूप नै २५औँ मदन–आश्रित स्मृति दिवसका अवसर पारेर बिहीबार एकीकरणको कामलाई विधिवत् पूर्ण गरियो । झण्डै साढे सात महिना लामो निरन्तर प्रयासपछि दुई दल औपचारिक रूपमा एउटै पार्टी बनेका हुन् । गत असोज १७ गते एमाले, माओवादी केन्द्र र नयाँ शक्ति पार्टीबीच तत्कालका लागि चुनावी तालमेल गर्ने र चुनावपछि पार्टी एकीकरण गर्ने सहमति भएको थियो । नयाँ शक्तिका संयोजक डा. बाबुराम भट्टराई भने केही समयपछि नै सहमतिबाट बाहिरिनुभएको थियो ।
दशैँको लगत्तै यी दलहरूले चुनावी तालमेल र पछि एकीकरण गर्ने सहमति गर्दा जनतामा उत्साह र आश्चर्य देखिएको थियो । त्यसबेला जारी छबुँदे सहमतिको पहिलो बुँदामै ‘पार्टी एकीकरण गरी एउटै कम्युनिस्ट पार्टी निर्माण गर्नेे’ उल्लेख थियो । सहमति अनुसार एउटै घोषणापत्र बन्यो र साझा उम्मेदवार लिएर चुनावी मैदानमा गए । यसको परिणाम स्वरूप वाम गठबन्धनलाई दुईतिहाइको नजिक बहुमत प्राप्त भयो । त्यसयता पार्टी एकीकरणमा बेलाबखत अन्योल र एकीकरण घोषणामा ढिलाई हुँदा एकीकरण नहुने हो कि भन्ने आशङ्का देखिएको थियो तर जनताले एकीकरणको पक्षमा दिएको अभिमत र राजनीतिक सङ्क्रमण र अस्थिरताको अन्त्य गरेर मात्रै शान्ति र समृद्धि हासिल हुनसक्ने ठहरका कारण दुई दलको एकीकरणमा बल पुगेको मान्नसकिन्छ । गठबन्धनकै कारण सङ्घीय संसद्को प्रतिनिधिसभामा एमाले १२१ र माओवादी केन्द्र ५३ सिटमा विजय हासिल गर्न सफल रह्यो । एकीकरणपछि नेपाल कम्युनिस्ट पार्टी तीनै तहका सरकारमा एउटा बलियो पार्टी बनेको छ । एकीकृत पार्टीबाट अब राष्ट्रियसभामा ३९ सदस्य (६९.६४ प्रतिशत) र प्रतिनिधिसभामा १७४ सदस्य (६३.२७ प्रतिशत) र प्रदेशसभामा ३५१ सिट (६३.८२ प्रतिशत) कायम भएको छ । प्रदेशसभामध्ये पाँचवटामा स्पष्ट दुईतिहाइ र प्रदेश ४ मा स्पष्ट बहुमत हुन्छ भने प्रदेश २ मा बहुमत नभए पनि सबभन्दा ठूलो दल बन्न पुगेको छ । प्रतिनिधिसभाको निर्वाचनमा ४५.७१ प्रतिशत जनप्रिय मत पाएको छ । स्थानीय तहका कुल ३५ हजार ४१ निर्वाचित पदमध्ये एकीकृत पार्टीको करिव ५६ प्रतिशत हुन्छ ।
लामो समयदेखि राजनीतिक अस्थिरता र सङ्क्रमणमा रहेको अवस्थामा तत्कालीन वाम गठबन्धनको राजनीतिक स्थिरता र आर्थिक समृद्धिको नारा जनताको मन छुन सफल भयो । आमजनता यसकै पक्षमा उभिए । सत्ता र शक्तिका लागि नैतिक मूल्य र मान्यता बिर्सने प्रवृत्तिका कारण निराश बनेका नेपाली जनतालाई यसले नयाँ उत्साह र आशा जगाएको छ । कम्तीमा दुईतिहाइ नजिक रहेको एउटा सशक्त दलको सरकार बनेको छ । यसले मुलुकमा राजनीतिक स्थायित्व र आर्थिक समृद्धि ल्याउने विश्वास गर्नसकिन्छ । यही नै चुनावताकाको वाम गठबन्धन र अहिलेको एकीकृत पार्टीप्रति जनताको अपेक्षा हो । पार्टी एकीकरण हुनु अग्रगामिताको परिचायक त हो तर चुनौती पनि कम छैनन् । राजनीतिक दलहरू आन्तरिक गुटबन्दीले ग्रस्त रहेको अवस्थामा दुईवटा दल एकीकरण भएर बन्ने दलमा दुई दलका कार्यकर्ताबीच यो र त्यो दलको भन्ने सीमा मेटिन समय लाग्नसक्छ । यसका लागि नेतृत्व तथा कार्यकर्ता पङ्क्तिले समेत ठूलो हृदयको परिचय दिँदै अघि बढ्नु जरुरी छ । व्यक्तिगत अहं, प्रतिष्ठाको लडाइँ, सत्ता र शक्तिप्रतिको लोभले गर्दा समस्या आउने हो, यसविरुद्ध सचेतता, सजगता र सक्रियता हुनासाथ मुलुकले नयाँ सम्भावनाको आयाम प्राप्त गर्नेछ । जनताको आशा, भरोसा र विश्वासलाई टुट्न नदिनु एकीकृत पार्टीको दायित्व बनेको छ । एकीकरण गरी ऐतिहासिक फड्को मार्न सफलता प्राप्त भए झै मुलुकलाई समृद्धिको शिखरमा पु¥याउन पनि अभूतपूर्व सफलता हासिल हुनसकोस्, हार्दिक शुभकामना ।

 

 

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds