काठमाडौं, फागुन ४ गते । चार महिना शीर्षस्थानमा रहेको आर्सनललाई हराउँदै म्यानचेस्टर सिटी इङ्लिस प्रिमियर लिग फुटबलको शीर्षस्थानमा उक्लिएको छ ।
बुधबार राति भएको खेलमा सिटीले आर्सनललाई उसैको मैदानमा ३-१ गोलले हरायो । सिटी नोभेम्बर महिनापछि शीर्षस्थानमा उक्लिएको हो । सिटीको जितमा केभिन डि ब्रुयन, ज्याक ग्रेलिस र अर्लिङ ब्राउट हालान्डले गोल गर्नुभयो ।
आर्सनलका बुकायो साकाले सान्त्वना गोल फर्काउनुभयो । सिटीले २४ओं मिनेटमा ब्रुयनको गोलबाट अग्रता लिएको थियो । उहाँले आर्सनलका रक्षकको गल्तीमा खाली पोस्टमा गोल गर्नुभएको थियो ।
त्यसपछि ४२औं मिनेटमा बुकायो साकाले पेनाल्टीमा गोल गर्दै खेललाई बलाबरीमा ल्याउनुभयो । डिबक्सभित्र सिटीका गोलरक्षक एडर्सन मोराएसले इडवार्ड एनकेइटालाई फल हानेपछि आर्सनलले पेनाल्टीको मौका पाएको थियो । त्यसपछि ग्रेलिसले ७२औं र हालान्डले ८२औं मिनेटमा गोल गर्दै सिटीलाई सजिलै जिताउनुभयो ।
जितसँगै शीर्षस्थान कब्जा गरेको सिटीले २३ खेलबाट ५१ अङ्क बनाएको छ । एक खेल कम खेलेको आर्सनलको पनि ५१ अङ्क छ । आर्सनल गोल अन्तरका आधारमा पछि परेको हो । तेस्रो स्थानमा रहेको म्यानचेस्टर युनाइटेडको ४६ अङ्क छ । एजेन्सी
