बजेटमै कृषि ‘जोन’ घोषणा गर्न माग

काठमाडौँ, जेठ २ गते । प्रदेश २ बाट प्रतिनिधित्व गर्ने प्रतिनिधिसभा तथा राष्ट्रियसभा सदस्यले प्रदेश २ लाई कृषि जोन घोषणा गर्ने व्यवस्था बजेटमै गर्न प्रधानमन्त्री केपी शर्मा ओलीलाई सुझाव दिनुभएको छ । प्रधानमन्त्री निवासमा मङ्गलबार प्रधानमन्त्री ओलीलाई भेटेर आगामी बजेटमा प्रदेश २ को आर्थिक समृद्धि र विकासका लागि कृषिलाई विशेष प्राथमिकतामा राख्दै कृषि जोन घोषणा गर्न आग्रह गरिएको माओवादी केन्द्रका नेता एवं प्रतिनिधिसभा सदस्य रामेश्वर राय यादवले जानकारी गराउनुभयो । 

प्रदेश २ विकास सूचकाङ्कमा पछाडि परेको उल्लेख गर्दै सांसदले यो प्रदेशलाई अन्नको भण्डार र औद्योगिक क्षेत्रको रूपमा विकास गर्नुपर्ने हुँदा आगामी आर्थिक वर्षमा योजना समावेश गर्न प्रधानमन्त्री ओलीलाई ध्यानाकर्षण गराउनुभएको छ ।
प्रदेश २ लाई कृषि जोन घोषणा गर्नुको साथै अर्गानिक मल कारखाना स्थापना, कृषि विश्वविद्यालय स्थापना, राष्ट्रियस्तरको प्रविधियुक्त कृषि बजारको निर्माण, लोकमार्गको उत्तरतर्फ पशुपालन, फलफूल तरकारी खेती, चिया खेती तथा लोकमार्गको दक्षिणतर्फ माछापालन, अन्न उत्पादन र बीउबिजन उत्पादन लगायतका विषय आगामी वजेटमा समावेश गर्नुपर्ने माग गर्दै उहाँहरूले ज्ञापनपत्रमा बुझाउनुभएको छ ।
त्यस्तै सुनकोसी मारिन बागमती सिँचाइ आयोजना, सुनकोसी कमला डाइभर्सन, गण्डक नहर पुनः संरचना गर्नुपर्ने कुरा पनि बजेटमा उल्लेख गर्नुपर्ने माग गरिएको सांसद यादवले जानकारी गराउनुभयो ।
दुईवटै सदनमा २० जना सांसदले हस्ताक्षर गरी बुझाएको ज्ञापनपत्रमार्फत बन्द भएका जनकपुर चुरोट कारखाना, वीरगञ्ज कृषि औजार कारखाना र वीरगञ्ज चिनी काराखाना लगायतका उद्योगलाई आधुनिकीकरण गरी पुनर्संरचना गरी सञ्चालनमा ल्याउने व्यवस्था गर्न उहाँहरूले आग्रह गर्नुभएको छ । त्यस्तै, प्रदेश २ का आठवटै जिल्लामा औद्योगिक क्षेत्र स्थापनाको माग पनि गरिएको छ । ropai
कोसी वन्यजन्तु आरक्षण, छिन्नमस्ता भगवती मन्दिर सखडा, राजा सलहेस दरबार सिरहा तथा फूलबारी धाम, जनकपुरको जानकी मन्दिर, मणिमण्डप, तथा धनुषाधाम, महोत्तरीको जलेश्वरनाथ मन्दिर, रौतहट नुनथर, बाराको गढीमाई, पर्साको विन्ध्यवासिनीमाई र पर्सा वन्यजन्तु आरक्षण केन्द्रलाई पर्यटनको सर्किट बनाउने विषय पनि बजेटको शीर्षकमा राख्नुपर्ने माग गरिएको छ ।
जनकपुर जयनगर, बर्दिबासदेखि सिमरासम्मको रेल मार्ग द्रुत गतिमा निर्माण, हुलाकी मार्ग निर्माण, प्रत्येक जिल्लाको सदरमुकाम हुँदै भारतको सीमासम्म चार लाइनको सडक, लोकमार्गदेखि मध्यपहाडी मार्गसम्मको सडक, निजगढको प्रस्तावित अन्तर्राष्ट्रिय हवाई मार्ग विमानस्थल यथाशीघ्र निर्माण, निजगढ काठमाडौँ फास्ट ट्रयाक अविलम्ब निर्माण, राजविराजको एयरपोर्टमा कार्गो सेवा सञ्चालन, जनकपुर एयरपोर्टको स्तरोन्नति गर्दै रात्रि सेवा सञ्चालन गर्ने, रामायण सर्किटलाई जनकपुर, धनुषाधाम र धारापानीसम्मको चार लाइनको सडक, कञ्चनरुप नगरपालिका–१२, रूपनगर चोकबाट बस्तीपुर हुँदै उदयपुर सिँचाइसम्मको सडक निर्माणलाई बजेटमा समावेश गर्नुपर्ने उहाँहरूले माग गर्नुभएको छ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds