किसानले बिर्से भ्यागुताको बिहे !


गोकर्ण दयाल

बैतडी, जेठ २ गते । खेती गर्न आकाशेपानीमा निर्भर रहेका पाटन नगरपालिका–६ सिलङ्गा र भकुडावासी बर्सेनि भ्यागुताको बिहे गर्ने, बाजा बजाएर असिमकेदारको पूजापाठ गर्नमै समय बितेपछि खेतमा छरेको धानको ब्याड सुक्ने गर्दथ्यो । यो वर्ष कोटेडीगाडमा एक करोड २० लाखको सिँचाइ योजना सम्पन्न भएर नहरमा कलकल पानी बग्न थालेपछि भकुडावासीले भ्यागुताको विवाह बिर्सेका छन् ।
एक वर्ष लगाएर भर्खरै सिँचाइ योजना सम्पन्न भएको छ । खेती गर्न आकाशेपानीको भरमा थियौँ । साउन लागेपछि मात्रै खोलामा पानी हुन्थ्यो । पानी नपर्दा देउताको पूजापाठ र भ्यागुताको विवाह गर्नमै समय बित्ने गर्दथ्यो । अब त किसानले बारीमा तरकारी लगाउन सुरु गरेका छन्, कोटेडीगाड सिँचाइ योजनाका अध्यक्ष एवं स्थानीय कृषक उद्धवदेव पन्तले भन्नुभयो ।
कोटेडीगाड सिँचाइ योजना सम्पन्न भएपछि पाटन नगरपालिका–६ सिलङ्गा, लामाखेत, सुन्दरकोट, कणाँली र भकुडा गाउँमा नहरको कुलोमा कलकल पानी बग्न थालेपछि किसानहरू परम्परागत खेती परिवर्तन गरेर धान, गहुँसँगै तरकारी खेती गर्न उत्साहित भएका छन् ।
सिँचाइ योजना सम्पन्न भएपछि यो वर्ष समयमै रोपाइँ गर्न यहाँका किसान ढुक्क भएको सिँचाइ योजना उपभोक्ता समितिका अध्यक्ष उद्धवदेव पन्तले बताउनुभयो । सिँचाइ योजना सम्पन्न भएर गाउँमा पानी पुगेपछि स्थानीय कृषकहरूले आलु, प्याज र अन्य तरकारी खेती गर्न सुरु गरेको पन्तले बताउनुभयो ।
२०७३ फागुनदेखि निर्माण सुरु भएको सिँचाइ योजना २०७४ फागुनमा सम्पन्न भएपछि यो वर्ष गहुँबाली पनि राम्रो भएको पन्तले बताउनुभयो । रोपाइँ गर्न यहाँका किसानले ब्याड छरिसकेका छन् । यो वर्ष समयमै रोपाइँ हुने उहाँले बताउनुभयो ।
कोटेडीगाड सिँचाइ योजना सम्पन्न भएपछि पाटन नगरपालिका–६ का सिलङ्गा र भकुडालगायतका गाउँको २५ हेक्टर जमिनमा सिँचाइ सुविधा पुगेको सिँचाइ विकास डिभिजन कार्यालय पाटन बैतडीका प्रमुख उग्रनाथ झाले जानकारी दिनुभयो ।
पानीको अभाव हुँदा कृषकले समयमै खेतीपाती गर्न नसक्ने बाध्यता थियो । सिँचाइ योजना बनेपछि यस्तो बाध्यता अन्त्य भएको छ, कार्यालय प्रमुख उग्रनाथ झाले भन्नुभयो । सिँचाइ योजना सम्पन्न भएपछि सुर्नया नदी वरपर रहेका गाउँमा परम्परागत खेतीमा निर्भर रहेका कृषकहरू आधुनिक तरकारी खेती गर्न सके धान र गहुँभन्दा दोब्बर फाइदा हुने कृषकलाई जानकारी गराइएको झाले बताउनुभयो ।
सुर्नया नदीलाई यहाँका स्थानीयले वरदानका रूपमा लिने गरेको पाटन नगरपालिका–२ का ७६ वर्षीय लालसिंह ऐरले बताउनुभयो । सुर्नयाको शिरदेखि तिरसम्म धान र गहँु तराईको भन्दा राम्रो हुन्छ । पहिले धान र गहुँ मात्र लगाउने चलन थियो । अहिले त तरकारी लगाउने चलन आएपछि दोब्बर फाइदा हुने भएकाले सबै किसान तरकारी खेतीमा लाग्नु फाइदा छ । नयाँ पुस्तालाई बृद्ध लालसिंह ऐरले सुझाव दिने गरेको बताउनुभयो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds