पशुपति क्षेत्र विकास कोषको गुरुयोजना तयार गरिदै

काठमाडौँ, वैशाख ६ गते । आगामी असोज महिनासम्ममा पशुपति क्षेत्र विकास कोषको गुरुयोजना तयार भई सार्वजनिक हुनेभएको छ । सँस्कृति, पर्यटन तथा नागरिक उड्डयन मन्त्री रवीन्द्र अधिकारीले कोषको ३२ औँ वार्षिकोत्सवका अवसरमा बुधबार आयोजित कार्यक्रममा यस्तो जानकारी दिनुभयो ।  उहाँले स्थानीय तहको साझेदारी कोषले व्यापक काम गर्नुपर्छ भन्नुभयो ।
सभामा कोषका पूर्व कोषाध्यक्ष तारानाथ दाहालले कोषको ४६ हजार रोपनी जग्गा रहेको अभिलेख रहेपनि हाल चारहजार चानचुन मात्र खुल्न आएको बताउँदै यो जग्गा के, कसरी र किन घटी हुन पुग्यो भनेर खोजविन गर्नुपर्छ भन्नुभयो ।
कोषका कार्यकारी निर्देशक रमेश उप्रेतीले पशुपतिनाथको भेटी पारदर्शी बनाउनु अझै चुनौतीपूर्ण रहेको बताउँदै २०४३ सालमा बनेको ऐन वर्तमान सन्दर्भमा संशोधन नभएर कामकाजमा असहजता आएको बताउनुभयो ।
त्यस अवसरमा कोषका सदस्य सचिव डा. प्रदीप ढकालले पशुपति क्षेत्रका हरेक घर मन्दिरमा परिणत हुनुपर्छ भन्नुभयो । उहाँले यसै अनुरुप गुरुयोजना तयार हुनुपर्ने बताउनुभयो ।
त्यस अवसरमा नेपाल स्काउट, नेपाल रेडक्रसलाई उहाँले पशुपति क्षेत्रमा पुर्याएको योगदान स्वरुप कदरपत्र प्रदान गर्नुभयो । कोष अक्षय तृतीयाका दिन स्थापना भएको थियो ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds