पार्टी एकता संयोजन समितिको बैठक आज बस्दै

KP-oli-Prachandaकाठमाडौंँ, वैशाख ४ गते । पार्टी एकीकरणको विषयमा नेकपा (एमाले) अध्यक्ष एवं प्रधानमन्त्री केपी शर्मा ओली र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’बीच सोमबार छलफल भएको छ । उहाँहरूबीचको छलफल सकारात्मक रहेको बताइएको छ ।  सिन्धुपाल्चोकको सिकुटेबाट फर्केपछि माओवादी केन्द्रका अध्यक्ष प्रचण्ड सोमबार प्रधानमन्त्री ओलीको सरकारी निवास बालुवाटार पुग्नुभएको थियो । दुईजनाको बीचमा पार्टी एकीकरणका लागि मिल्न नसकेका विषयमा छलफल हो । 

एमाले संसदीय दलका उपनेता सुवासचन्द्र नेम्बाङले पार्टी एकीकरणको विषयमा दुईजना अध्यक्षको बीचमा भएको छलफल सकारात्मक भएको बताउनुभयो । उहाँले मङ्गलबार बस्ने एकता संयोजन समितिको बैठकबाट नमिलेका विषयलाई टुङ्गो लगाउने बताउनुभयो ।
दुईजनाको बीचमा भएको छलफल सकारात्मक भए पनि त्यस विषयलाई एकता संयोजन समितिमार्फत टुङ्गो लगाउने सहमति भएको छ । एकता संयोजन समितिको बैठक मङ्गलबार बिहान बोलाउने सहमति भएको अध्यक्ष प्रचण्डका प्रेस संयोजक विष्णु सापकोटाले जानकारी गराउनुभयो ।
एकताका लागि लगभग सबै कुरा कार्यदलले टुङ्ग्याइसकेको छ । चुनाव चिह्न, ‘जनयुद्ध’ शब्द र केन्द्रीय समितिको सङ्ख्यामा हिस्सेदारी विषयमा कुरा मिलेको छैन । यी तीन विषयमा कार्यदलमा पनि छलफल भएको हो तर त्यहाँ कुरा नमिलेपछि त्यसलाई एकता संयोजन समितिमा पठाइएको छ । एमाले एकीकृत पार्टीको चुनाव चिह्न सूर्य राख्नुपर्ने अडानमा छ भने माओवादी केन्द्रले त्यसलाई स्वीकारेको छैन ।
त्यस्तै एकीकृत पार्टीको बन्ने २९९ सदस्यीय कार्यसमितिमा माओवादी केन्द्रले बराबरीको हिस्सेदारी खोजेको छ । कार्यदलले २९९ सदस्यीय कार्यसमिति बनाउने सहमति गरे पनि कुन दलको कति जना रहने टुङ्गो लगाउन सकेन ।
माओवादी केन्द्रमा तीन हजार ९९९ जना केन्द्र्रीय सदस्य छन् भने ३९९ जना पोलिटब्युरो सदस्य र ३४ जना स्थायी समिति सदस्य रहेका छन् । त्यस्तै एमालेमा १९८ जना केन्द्रीय सदस्य छन् भने ५९ जना पोलिटब्युरो सदस्य र २६ जना स्थायी समिति सदस्य रहेका छन् । पार्टी एकीकरणको समयमा माओवादी केन्द्रको कार्यसमिति सदस्य सङ्ख्या घटाउने भनेको छ ।
पार्टी एकीकरण गर्ने सहमति भएको बेला ६०/४० को हिसाबमा सहमति भएको थियो तर माओवादी केन्द्रले अहिले आएर हिसाब चुनावका लागि मात्र भएको, एकीकरणका लागि नभएको दाबी गर्दै आएको छ । माओवादी केन्द्रका अध्यक्ष प्रचण्डले पनि सार्वजनिक रूपमै सम्मानजनक अवस्थामा पार्टी एकीकरण हुने भन्दै आउनुभएको छ । त्यसैगरी पार्टीको विधान तथा राजनीतिक दस्तावेजमा जनयुद्ध शब्द व्याख्यासहित राख्नुपर्ने माओवादी केन्द्रको दाबी रहेको छ ।
सोमबार बालुवाटारमा दुईजना अध्यक्षको बीचमा भएको छलफलमा यी विषयमा पनि छलफल भएको हो तर कुनै निष्कर्ष ननिकाली यी विषयलाई एकता संयोजन समितिमा लगिएको छ । यी दुईजना अध्यक्षकोे बीचमा आइतबार नै छलफल हुने कुरा थियो तर अध्यक्ष प्रचण्ड आकस्मिक रूपमा सिन्धुपाल्चोक गएपछि छलफल हुन पाएको थिएन ।
एकीकरणका लागि गठन भएको दुईवटै कार्यदलले एकता संयोजन समितिलाई चैत २० गते आफ्नो प्रतिवेदन बुझाएको थियो । चैत २२ गते एकता संयोजन समितिको बैठक बसेको थियो । त्यो बैठकमा खासै सहमति बन्न सकेन । भारत भ्रमणबाट फर्केपछि चैत २७ गते अर्को बैठक बस्ने सहमति गरेको थियो ।

 

थप समाचार
प्रतिकृया
नाम

ईमेल

ठेगना