विमान दुर्घटना : छानबिन आयोगले थाल्यो काम

राधा चालिसे

काठमाडौँ, फागुन ३० गते । त्रिभुवन अन्तर्राष्ट्रिय विमानस्थलमा भएको यूएस बङ्गला विमान दुर्घटनाका विषयमा छानबिन गर्न गठन गरिएको आयोगले काम सुरु गरेको छ ।  संस्कृति, पर्यटन तथा नागरिक उड्डयन मन्त्रालयका सहसचिव सुरेश आचार्यले विमान दुर्घटनाका विषयमा आयोगका लागि कुनै समयसीमा नतोकिए पनि छानबिन गरेर छिटोभन्दा छिटो प्रतिवेदन तयार गरिने विमानस्थलमा आयोजित पत्रकार सम्मेलनमा जानकारी दिनुभयो ।
आयोगले क्यानडाको विमान निर्माता कम्पनी, बङ्गलादेशका सरोकारवाला निकाय, विभिन्न क्षेत्रका विज्ञलाई आवश्यक जानकारी उपलब्ध गराइदिन पत्राचार गरिसकिएको उहाँले बताउनुभयो । विमान दुर्घटना जाँच नियमावलीमा भएको व्यवस्थाअनुसार आवश्यक परे आयोगमा बङ्गलादेशका प्रतिनिधि पनि राख्न सकिने उहाँले जानकारी दिनुभयो ।
मन्त्रिपरिषद्को सोमबार बसेको बैठकले पूर्वसचिव यज्ञप्रसाद गौतमको संयोजकत्वमा ६ सदस्यीय छानबिन आयोग गठन गरेको छ । समान्यतया यस्ता दुर्घटना छानबिन गर्न ९० दिनदेखि पाँच महिनासम्म लाग्ने
उहाँले बताउनुभयो ।  विमान के कति कारणले दुर्घटना भएको हो भन्ने कुरा छानबिन आयोगको प्रतिवेदन आएपछि मात्र स्पष्ट हुने नागरिक उड्डयन प्राधिकरणका महानिर्देशक सञ्जीव गौतमले बताउनुभयो । गौतमले दुर्घटनाको उद्धार कार्यमा कुनै ढिलाइ नभएको दाबीसमेत गर्नुभयो ।
दुर्घटना भएको तीन मिनेटभित्रै उद्धारमा जुट्नुपर्ने अन्तर्राष्ट्रिय मान्यता रहेको भन्दै मङ्गलबार दुई मिनेटभित्र उद्धार कार्य सुरु भएको पनि उहाँले बताउनुभयो । दुर्घटनाग्रस्त क्षेत्रमा रहेको झाडीमा आगो फैलिएकाले त्यसलाई पनि नियन्त्रण गर्नुपर्ने भएपछि उद्धारको गति केही सुस्त भएको उहाँले स्वीकार गर्नुभयो ।
बङ्गलादेशका अधिकारी काठमाडौँमा
दुर्घटनाका बारेमा जानकारी लिन बङ्गलादेशका उच्च सरकारी प्रतिनिधिमण्डल मङ्गलबार काठमाडौँ आइपुगेको छ । प्रतिनिधिमण्डलमा बङ्गलादेशका नागरिक उड्डयन मन्त्री एकेएम साहजान कमल र परराष्ट्र राज्यमन्त्री सहरिर अलाम छन् । त्यसैगरी बङ्गलादेशको नागरिक उड्डयन प्राधिकरणका उच्च पदाधिकारी, दुर्घटनामा परेका व्यक्तिका आफन्तजन पनि टोलीमा सहभागी भएको परराष्ट्र मन्त्रालयले जानकारी दिएको छ ।
प्रतिनिधिमण्डलसँग नेपाल सरकारका तर्फबाट संस्कृति, पर्यटन तथा नागरिक उड्डयन मन्त्रालयका प्रतिनिधिले भेट गरेर दुर्घटनाका बारेमा विस्तृत जानकारी दिएका थिए । त्यसैगरी दुर्घटनाका विषयमा छानबिन गर्न आयोग गठन गरिएको भन्दै त्यसलाई आवश्यक सहयोग दिन पनि बङ्गलादेशी प्रतिनिधिमण्डललाई आग्रह गरिएको मन्त्रालयका सहसचिव आचार्यले जानकारी दिनुभयो ।

थप समाचार
प्रतिकृया
नाम

ईमेल

ठेगना