अनुदान हटेपछि अर्गानिक मलको बिक्रीमा कमी

बाँके, फागुन २८ गते । बाँकेको खजुरा गाउँपालिका ४ ईगाउँमा सञ्चालनमा रहेको अर्गानिक मल उत्पादन कम्पनीमा उत्पादन हुने अर्गानिक मलप्रति किसानको आकर्षण बढ्न थालेको छ । व्यवसायी सुरेन्द्र श्रेष्ठसहित पाँचजनाको समूहले चार वर्षअघि तीन करोड २५ लाख रुपियाँको लागतमा दिव्या अर्गानिक फर्टिलाइजर प्राइभेट लिमिटेड सञ्चालनमा ल्याएको हो । 

पश्चिम नेपालको पहिलो र ठूलो अर्गानिक मल उत्पादनको रूपमा रहेको यस उद्योगले बाँके र बर्दियाका किसानबाट गोबर सङ्कलन गर्ने गरेको छ । मल उत्पादनका लागि हालसम्म ३० टन गड्यौला भने भारत उत्तराखण्डको पन्तनगरबाट ल्याइएको प्रालिका अध्यक्ष श्रेष्ठले जानकारी दिनुभयो । भारतबाट प्रतिटन ८० हजार भारुमा गड्यौला ल्याइएको छ । ३ क्विन्टल मलमा २० किलो गड्यौला मल उत्पादनका लागि बनाइएका यार्डमा राखिन्छ, प्रालिका अध्यक्ष श्रेष्ठले भन्नुभयो, जसमा ७० देखि ९० दिनमा करिब ५० प्रतिशतसम्म अर्गानिक मल उत्पादन हुने गरेको छ ।
उद्योगबाट उत्पादिन अर्गानिक मल विशेष गरी कर्णालीका जिल्ला जाने गरेको छ । यसैगरी प्रदेश ५, ६ र ७ का अन्य जिल्लामासमेत पु¥याउने गरिएको छ । कृषि सामग्री कम्पनीमार्फत पनि अर्गानिक मल पठाउने गरिएको अध्यक्ष श्रेष्ठले जानकारी दिनुभयो ।
मानिसको स्वास्थ्यसँगै स्वच्छ वातावरणका लागि अनुकूल मानिएको अर्गानिक मलमा सुरुमा सरकारले अनुदान दिने गरेको थियो । सुरुमा अर्गानिक मलमा ५० प्रतिशत अनुदान दिने गरेकोमा पछि घटाउँदै २५ प्रतिशत झारियो । त्यसपछि १५ मा झारेर हटाइएपछि अर्गानिक मलको बिक्री–वितरण घटेको छ ।
भारतबाट आयात हुने डीएसपी र युरिया मलको आयात रोक्ने र स्वस्थ वातावरण राख्ने उद्देश्यका लागि अर्गानिक मल उत्पादन गर्न थालेका हौँ, प्रालिका अध्यक्ष श्रेष्ठले भन्नुभयो, तर सरकारले भारतबाट रासायनिक मल आयात बढाउँदै स्वदेशी अर्गानिक मलमा दिँदै आएको अनुदान रोकेपछि समस्या उत्पन्न भएको छ । हाल उद्योगमा करिब तीन सय टन अर्गानिक मल स्टक रहेको छ ।
किसानहरूमा अर्गानिक मल प्रयोग गर्नुपर्छ भन्ने मानसिकता बन्दै गए पनि अनुदान हटेपछि प्रयोगमा पनि कमी आएको छ । अर्गानिक मल सबै किसिमका खाद्यान्न, नगदे र तरकारी बालीका लागि उपयुक्त हुने अध्यक्ष श्रेष्ठले बताउनुभयो ।
हालसम्म किसानलाई चार सय टन र कृषि सामग्री कम्पनीलाई चार लाख टन बिक्री गरे पनि सरकारले अनुदान रोकेपछि भने बिक्री–वितरण न्यून छ । उद्योगले बाँके बर्दियाका किसानबाट प्रतिट्रली चारदेखि छ हजार रुपियाँमा गोबर मल खरिद गर्ने गरेको छ । अर्गानिक मल प्रतिकिलो २७ रुपियाँ मूल्य राखिएको छ । यसको एक किलो, पाँच किलो र २५ किलोको प्याकिङ गरिएको छ ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds