सरकारमा सहभागी हुन संविधान संशोधन फोरमको शर्त

काठमाडौ फागुन १० गते । सरकारमा सहभागिताको विषयमा नेकपा (एमाले) ले संघीय समाजवादी फोरम नेपालसँग छलफल शुरुगरेको छ । दुई दलबीच बुधवार भएको छलफलमा फोरम नेपालले सरकारमा सहभागी हुन सविधान संशोधनलाई शर्तका रुपमा अगाडि सारेको छ । 

सरकारमा सहभागी हुन कुनै आपत्ति छैन, तर त्यसअघि सविधान संशोधन हुनुपर्ने प्रस्ताव फोरम नेपालले राखेको सो दलका महासचिव रामसहाय यादवले जानकारी गराउनुभयो ।
शुरुदेखि नै एमाले सविधान संशोधनप्रति सकारात्मक थिएन, त्यसमा एमालेको धारणा के रहेको छ, आफूहरुले जवाफ मागेको महासचिव यादवले बताउनुभयो । आवश्यक्ता अनुसार सविधान संशोधन गर्न सकिन्छ भन्ने कुरा एमालेले पनि भन्दै आएको छ, अब आवश्यक्ता परेकाले सविधान संशोधनका लागि आफूहरुले भनेको उहाँले बताउनुभयो ।
सविधान संशोधनप्रति एमाले पनि सकारात्मक रहेको र त्यसका लागि निरन्तर छलफल गर्नुपर्ने एमालेका सचिव प्रदीप ज्ञवालीले बताउनुभयो । सविधान संशोधनको विरोधी एमाले कहिले थिएन, त्यसका बारेमा कसैले एमालेसँग कुनै छलफल पनि गरेन भन्दै नेता ज्ञवालीले त्यसैले फोरम नेपाललाई सविधान संशोधनको विषयमा छलफल गरौं भनेको बताउनुभयो ।
फोरम नेपाल सरकारमा सहभागी हुने विषयमा सकारात्मक छ, तर, त्यसका लागि सविधान संशोधन हुनुपर्ने भनेको छ, हामीले के के विषयमा सविधान संशोधन गर्ने हो, ती विषयमा छलफल गरौं भनेका छौं, उहाँले भन्नुभयो ।
एमाले अध्यक्ष एवं प्रधानमन्त्री केपी शर्मा ओली र फोरम नेपालका अध्यक्ष उपेन्द्र यादवबीच फागुन ७ गते साँझ बालुवाटारमा पनि यसै विषयमा छलफल भएको थियो । त्यहाँ पनि फोरम नेपालका अध्यक्ष यादवले सरकारमा सहभागी हुन सविधान संशोधन नै आफूहरुको बटमलाइन रहेकाले त्यसको बारेमा स्पष्ट पार्न प्रधानमन्त्री ओलीलाई आग्रह गर्नुभएको थियो ।
त्यहाँ प्रधानमन्त्री अ‍ोलीले सविधान संशोधनका लागि आफू सकारात्मक रहेको र यसलाई छलफलको माध्यमबाट सुल्झाउन भन्नुभएको थियो । त्यसैको आधारमा बुधवारदेखि दुवै दलबाट छलफलका लागि जिम्मेवारी नै तोकेको छ । एमालेबाट नेता सुवास नेम्वाङ्, सचिव प्रदीप ज्ञवाली, नेता अग्नी खरेल र फोरमको तर्फबाट वरिष्ठ नेता अशोक राइ, सहअध्यक्ष राजेन्द्र महतो र महासचिव रामसहाय यादवले वार्ताका लागि जिम्मेवारी पाउनुभएको छ । बुधवारदेखि उहाँहरुले छलफल शुरु गर्नुभएको छ । त्यसमध्ये अग्नि खरेल महान्यायधिवक्तामा नियुक्त भएका कारणले छलफलमा जानुभएन ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds