मुख्यमन्त्रीमा राई र राउत नियुक्त

नवराज कट्टेल

 

विराटनगर, फागुन ३ गते । प्रदेश १ को मुख्यमन्त्रीमा नेकपा एमाले संसदीय दलका नेता शेरधन राई नियुक्त हुनुभएको छ । नेपालको संविधानको धारा १६८ को उपधारा १ बमोजिम प्रदेश प्रमुख गोविन्दबहादुर तुम्बाहाङले बुधबार राईलाई मुख्यमन्त्री नियुक्त गरिएको पत्र प्रदान गर्नुभएको हो ।  प्रदेश प्रमुख तुम्बाहाङको निवासमा राईले मुख्यमन्त्री पदमा नियुक्त भएको पत्र बुझ्नुभएको थियो । पत्र हस्तान्तरण गदैं तुम्बाहाङले राईलाई सफलताको शुभकामना दिनुभएको थियो ।
राई नेकपा एमाले प्रदेश १ को संसदीय दलको नेतामा गत माघ २६ गते निर्वाचित हुनु भएको थियो । उहाँ भोजपुर जिल्लाको प्रदेशसभा सदस्य निर्वाचन क्षेत्र (ख) बाट निर्वाचित हुनु भएको थियो ।
मुख्यमन्त्रीमा नियुक्त हुनु भएको राईले पद तथा गोपनियताको शपथ बिहीबार ३ बजे विराटनगरस्थित वीरेन्द्र सभागृहमा लिएसँगै प्रदेश सरकारको जिम्मेवारी सम्हाल्नु हुनेभएको छ । मुख्यमन्त्रीमा नियुक्त भएको पत्र बुझेपश्चात पत्रकारसँग कुरा गर्नुहुँदै राईले सपथ ग्रहणसँगै सानो आकारको मन्त्रीमण्डल गठन गरिने बताउनुभयो । उहाँले सानोमा ३ र ठूलोमा ५ सदस्यीय मन्त्री मण्डल गठन गर्ने बताउनुभएको हो ।
बिहीबार गठन हुने मन्त्री परिषद्मा नेकपा (माओवादी केन्द्र) समेत संलग्न हुने बताइएको छ । गठबन्धनबीच उच्च समझदारी कायम भएकोले मन्त्रीपरिषद् सानो आकारकै हुने उहाँको भनाइ छ । प्रदेशसभामा एमालेका ५१ प्रदेश सांसदसहित स्पष्ट बहुमत छ ।
यसैगरी जनकपुर समाचारदाता धर्बेन्द्र झा अनुसार प्रदेश २ को मुख्यमन्त्री पदमा सङ्घीय समाजवादी फोरम नेपालका वरिष्ठ उपाध्यक्ष एवम् संसदीय दलका नेता लालबाबु राउत नियुक्त हुनुभएको छ । प्रदेश २ का प्रदेश प्रमुख रत्नेश्वरलाल कायस्थले नेपालको संविधान २०७२ को धारा १६८ को उपधारा (२) अनुसार राउतलाई बुधबार मुख्यमन्त्री नियुक्त गर्नुभएको हो ।sher-dhan-lalbabu-raut
प्रदेश प्रमुख कायस्थले नेपालको संविधान २०७२ को धारा १६८ को उपधारा (१) अनुसार कुनै एक दलको स्पष्ट बहुमत नभएकाले सोही धाराको उपधारा (२) बमोजिम बहुमत सावित गरी संयुक्त सरकार गठनका लागि उहाँलाई मुख्यमन्त्री नियुक्त गरिएको प्रदेश प्रमुखको कार्यालयका सचिव लावण्यप्रसाद ढकालले जानकारी दिनुभयो ।
यसअघि गत सोमबार प्रदेश प्रमुख कायस्थले मुख्यमन्त्रीका लागि दावीसहित दुई दलको समर्थनमा बहुमत प्रस्तुत गर्नका लागि दलहरुलाई आह्वान गर्नुुभएपछि सङ्घीय समाजवादी फोरम र राजपा नेपालका ५४ जना प्रदेशसभा सदस्यको हस्ताक्षरसहितको पत्र मङ्गलवार राउतले बुझाउनुभएको थियो । उहाँलाई राजपा नेपालका संसदीय दलका नेता जितेन्द्र सोनारले आफ्नो दलको २५ जना प्रदेशसभा सदस्यको हस्ताक्षर सहितको समर्थन पत्र बुझाउनुभएको थियो ।
प्रदेश प्रमुखको कार्यालयमा बुधबार एक कार्यक्रमको आयोजना गरी प्रदेश प्रमुख कायस्थले उहाँलाई मुख्यमन्त्री नियुक्त गरिएको पत्र बुझाउनुभएको थियो । कार्यक्रममा राजपा संसदीय दलका नेता सोनार, प्रमुख सचिव राजेश्वरमान सिंह, मुख्यमन्त्री कार्यालयका सचिव हरि फुँयाल, धनुषाका प्रमुख जिल्ला अधिकारी दिलिप चापागाई सहितका उच्च अधिकारी र राजनीतिक दलका नेताहरुको उपस्थिति थियो ।
प्रदेशको मुख्यमन्त्री पदमा नियुक्त भएपछि मुख्यमन्त्री राउतले जनकपुरका पत्रकारहरुसँग संक्षिप्त प्रतिक्रया दिदै प्रदेश २ को विकास र समृद्धि नै आफ्नो मूल लक्ष्य भएको बताउनुभयो ।
उहाँले प्रदेशमा सुशासन बहाली गरेर विकासका लागि आउने बजेटको सही सदुपयोग गराई प्रदेशलाई विकासको पथमा अग्रसर गराउने बताउनुभयो । कृषि र पूर्वाधारको विकासले नै प्रदेश २ नमुना प्रदेशको रुपमा विकसित हुने उहाँको धारणा थियो । उहाँले प्रदेश सभामा सहभागी सबै दलको साथ लिएर अघि बढने बताउनुभयो ।
पर्सा जिल्लाको निर्वाचन क्षेत्र नंं १ को (ख) वाट प्रदेशसभा सदस्यमा निर्वाचित राउत फोरम नेपालको संस्थापक सचिव हुनुहुन्छ । अङ्ग्रेजी विषयमा स्नात्तकोत्तर तथा कानून विषयमा स्नाताक गर्नुभएका राउत १० वर्षसम्म ठाकुरराम बहुमुखी क्याम्समा उप–प्राध्यापक हुनुहुन्थ्यो । २०२३ साल असार १५ गते जगन्नाथपुर ३ मा जन्मनुभएका राउत वीरगञ्ज उपमहानगरपालिका वडा नंं १३ तेजारथ टोलमा बस्दै आउनुभएको छ ।
वीरगञ्ज उपमहानगरपालिकामा अधिकृतको रुपमा पनि जागिर गर्नुभएका राउत आंशिक प्राध्यापक भएर पनि कामकाज गर्नुभएको थियो । उहाँले भारत, चीन तथा बङ्गलादेशको भ्रमण पनि गर्नुभएको छ । उहाँको परिवारमा बुबा दशरथ राउत, आमा राधिका देवी, श्रीमती जुलेखा खातुनसहित दुई छोरा र एक छोरी हुनुहुन्छ । उहाँले हिन्दुहरुका लागि मनाईने चाडपर्व तथा मुस्लिम समुदायको चाडपर्वलाई पनि उत्तिकै महत्व दिने गर्नुहुन्छ । नवनियुक्त मुख्यमन्त्री राउतलाई फागुन ३ गते जनकपुर चुरोट कारखानाको खेल मैदानमा आयोजना गरिने विशेष कार्यक्रमका बीच सपथग्रहण गराइने कार्यक्रम रहेको प्रदेश २ को प्रदेश प्रमुखको कार्यालयले जनाएको छ ।

थप समाचार
प्रतिकृया
नाम

ईमेल

ठेगना