सन्तोषजनक बिदाइको प्रतीक्षामा साधु सन्त

सरोज आचार्य
काठमाडौँ, फागुन २ गते । महाशिवरात्रि पर्वमा आएका साधु सन्त सन्तोषजनक बिदाइको प्रतीक्षामा छन् । पर्व सकिएपछिको फिर्ती यात्रा सन्तोषजनक हुने वा होइन भन्ने द्धिविधामा छन् उनीहरू । महाशिवरात्रि पर्व सकिएपछि राज्यले नगद दक्षिणा र बाटो खर्च सहित विदाइ गर्नुपर्ने प्रचलन भएकोले उत्साहका साथ प्रतीक्षा गरिएको हो ।
पशुपति गुठी गोश्वारा प्रमुख लछुना शर्मा काफ्लेका अनुसार साधुको बिदाइका लागि १४ लाख रुपियाँ व्यवस्था गरिएको छ । यो खर्च कालमोचनघाटमा धुनी जगाइ बसेका र पशुपतिमा रहेका दुवैका लागि हो । साधुको स्तर अनुसार जनही १५१ रुपियाँदेखि एकहजार ७५१ रुपियाँसम्म दक्षिणा व्यवस्था रहेको काफ्ले बताउनुभयो । कालमोचन र पशुपति दुवैतर्फका पाहुनालाई पशुपतिबाटै बिदाइ खर्च दिने व्यवस्था गरिएको छ ।
विगत केही वर्षयतादेखि कालमोचनघाटबाट गरिँदै आएको बिदाइलाई हटाइएको छ । गोश्वाराका वरिष्ठ लेखा सहायक युवराज रेग्मीका अनुसार कालमोचनमा भने धुनी जगाइ बसेको अभिलेख प्रमाणित भएपछि बिदाइ खर्च पशुपतिबाटै दिने व्यवस्था गरिएको हो । पशुपति क्षेत्र विकास कोषले पनि रुद्राक्ष माला सहित बिदाइ गर्दैछ ।
बिदाइमा घन्ट, चमर, लोटा, बख्खु, चिम्टा राडीपाखी लिनका लागि साधु आत्तुर छन् । अघोर सम्प्रदायका डा. त्यागीनाथ अघोरीले साधुलाई सम्मानजनक बिदाइ होस् भन्ने चाहना राख्नुभएको छ । विगतमा कसैलाई बिदाइ खर्च दोहोरो तेहेरो समेत पर्ने र कसैले बिदाइ खर्च नै नपाउने अवस्था नआओस् भन्ने उहाँको सुझाव छ ।
बिदाइका लागि गुठी संस्थानले पूर्र्जी र टिकट जारी गरेको छ । टिकट भएका साधुको औलामा रेजा चिह्न लगाएर खर्च दिने व्यवस्था भएको युवराज रेग्मी बताउनुहुन्छ । कालमोचन र पशुपति दुवै तर्फ चार हजार पाँच सय साधु धुनीमा रहनु भएको अभिलेख आएको छ ।
पहिलो राणा प्रधानमन्त्री जङ्गबहादुरले साधुलाई यो पर्वमा यहाँ आमन्त्रण गर्ने पद्धति बसालेका थिए, यिनै निम्तालु साधुले कोतपर्वमा मारिएका भारदार गाडिएको कालमोचनमा वर्षको एक पटक पाउ पारुन् भनेर कालमोचनबाट बिदाइ गर्ने व्यवस्था अपनाए पनि यो हराउँदै गएको छ । महाशिवरात्रिको यो खर्च जङ्गका दुइ छोरा जगतजङ्ग र जितजङ्को नामका जगनन्दप्रकाशेश्वर र जितजङ्गप्रकाशेश्वर गुठीबाट हुँदै आएको छ । बिहीवार साधुले बिदाइ पाउँदैछन् ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds