समयअघि नै मुस्ताङमा फुल्यो कागजी बदाम

अमृतप्रसाद पौडेल
म्याग्दी, पुस २९ गते । हिमालपारिको जिल्ला मुस्ताङको घरपझोङ गाउँपालिकाको मार्फामा कागजी बदाम फुलेको छ । यस वर्ष हिउँदको सिजनमा फुल्नेमध्ये सबैभन्दा पहिला कागजी बदाम फुलेको हो ।

पुस महिना सकिँनै लाग्दा पनि हिमपात नभए पनि सिंचाइ गरेर चिस्यान पुर्‍याएर शीतोष्ण हावापानीमा हुने फलफूल तथा तरकारीहरु अङ्कुरण हुने र फुल्नका लागि पुग्ने वातावरण मिलाइएको शीतोष्ण बागवानी विकास केन्द्र मार्फाका निमित्त प्रमुख पद्मनाथ आत्रेयले बताउनुभयो ।

विगतका वर्षमा हिमपातले चिलिङ आवर पुग्ने र त्यसपछि फलफूलका बोटमा फूल फुल्ने भए पनि यस वर्ष भने हिमपात नहुँदै कागजी बदाम फुलेको उहाँको भनाइ छ ।

आत्रेयका अनुसार बन्दाको डुकु पलाउने समय भएको छ भने गाजर र मुलामा पनि टुसाउने तरखरमा छ । शीतोष्ण हावापानीमा हुने फलफूल तथा तरकारीका लागि हिमपात आवश्यक हुने भए पनि यो वर्ष हिमपात हुन नसकेको  आत्रेय बताउनुहुन्छ ।

आगामी हप्ता दश दिनभित्रमा हिउँ नपर्ने हो भने शीतोष्ण हावापानीमा उत्पादन हुने फलफूल तथा तरकारी बीउ उत्पादनमा नकारात्मक असर पर्ने निमित्त प्रमुख आत्रेयको भनाइ छ ।