प्रदेश २ को सभामुख निर्वाचन भोलि

धनुषा, फागुन १ गते । प्रदेश २ को प्रदेशसभाको दोस्रो बैठकले सभामुखको निर्वाचन फागुन २ गतेका लागि तय गरेको छ । यस्तै बैठकले चारजना जनापछि थप्ने गरी १५ सदस्यीय नियमावली मस्यौदा समिति गठन गरेको छ । 

बैठकले मार्यादापालकको पोसाकको पनि टुङ्गो लगाएको छ । बैठकले मार्यादापालकहरूको पोसाक पुरुषहरूका लागि क्रिम कलरको सफारी सुट र महिलाका लागि सोही कलरको सारी चोलो राख्ने निर्णय गरेको हो ।
पहिलो बैठकका क्रममा मधेसवादी दलसम्बद्ध प्रदेशसभा सदस्यहरूले दौरा सुरुवाल पोसाकमाथि आपत्ति जनाउनुभएपछि मार्यादापालकले आफ्नै इच्छानुकुलको पोसाक लगाएर प्रदेश २ लेखिएको व्याचसहित प्रदेशसभाको पहिलो बैठकमा उपस्थित हुनुभएको थियो । सोमबारको बैठकमा मार्यादापालक पुरुषहरू दौरा, सुरुवाल, कोट र टोपी तथा महिलाहरूले सेतो साडी कोट लगाएर उपस्थित हुनुभएको थियो ।
यसअघि ज्येष्ठ सदस्य चौधरीको आदेशानुसार प्रदेशसभा सदस्य ज्ञानेन्द्रकुमार यादवले नेपालको संविधान २०७४ को धारा १९४ बमोजिम प्रदेशसभाले आफ्नो कार्य सञ्चालन गर्न, बैठकको सुव्यवस्था कायम राख्न र समितिहरूको गठन, काम कारवाही र अन्य कुरा नियमित गर्नका लागि प्रदेशसभा नियमावली, २०७४ समेतको मस्यौदा गरी लागू गर्न उपयुक्त भएकाले सदस्यहरूको नामावलीसहितको बढीमा १५ जना सदस्य रहने मस्यौदा समिति गठन गर्न प्रस्ताव गर्नुभएको थियो ।
प्रदेशसभा सदस्य यादवले गरेको प्रस्तावमाथि समर्थन गर्न प्रदेशसभामा सहभागी राजनीतिक दलका एक÷एकजना प्रदेशसभा सदस्यलाई ज्येष्ठ सदस्य चौधरीले अह्वान गर्नुभएको थियो ।
यादवको प्रस्तावमाथि प्रदेश सभा सदस्यहरू क्रमशः राजपा नेपालका मनिषकुमार सुमन, नेकपा एमालेका प्रमोदकुमार यादव, नेपाली काँग्रेसका शोभा लामा, माओवादी केन्द्रका ज्वालाकुमारी शाह, नेपाल सङ्घीय समाजवादी पार्टीका सावित्री देवी शाह र स्वतन्त्र प्रदेशसभा सदस्य शेख अबुल कलाम आजादले सर्मथन जनाउनुभएपछि सभामुख चौधरीले प्रदेश सभामा निर्णयार्थ प्रस्तुत गर्नुभएको थियो ।
नियावली मस्यौदा समितिमा प्रदेशसभा सदस्यहरू रामअशिष यादव, सञ्जयकुमार यादव, सरोजकुमार सिंह, रामनरेश राय, डिम्पल कुमारी झा, रमेशप्रसाद कुर्मी, सुन्दरबहादुर विश्वकर्मा, उपेन्द्रकुमार कुशवाहा, दिलिपकुमार साह, सावित्री देवी शाह र शेख अबुल कलाम आजाद रहनुभएको छ ।
दिउँसो १ बजेका लागि बोलाइएको वैठक निर्धारित समयभन्दा ५५ मिनेट ढिलो गरी सुरु भएको थियो । वैठकमा मधेस आन्दोलनका शहीदहरूको प्रतीकात्मक तस्बिर प्रदेश सभाको वैठक स्थलमा झुण्डयाइए पनि माओवादी जनयुद्धको बेला शहीद भएकाहरूको प्रतीकात्मक तस्बिर झुण्याइएको थिएन । ज्येष्ठ सदस्य चौधरीले वैठक सुरु भएलगतै सर्वदलीय सहमतिअनुसार अर्को वैठकमा माओवादी जनयुद्धका शहीदहरूको प्रतीकात्मक तस्बिर लगाउन रुलिङ गर्नुभएपछि विरोध गर्ने मनस्थितिमा रहनुभएका माओवादी केन्द्रका प्रदेशसभा सदस्यहरूले विरोध गर्नुभएन र वैठक सुरुभएको थियो ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds