एमाले र माओवादी वार्ता सकारात्मक

KP-oli-Prachandaकाठमाडौँ,  फागुन १ गते । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आफ्नो गृह जिल्ला गएर नयाँ फड्को मार्ने अभिव्यक्ति दिएसँगै वाम एकता हुने सम्भावना बढेको छ । नेकपा (एमाले) का अध्यक्ष केपी शर्मा ओली र माओवादी केन्द्रका अध्यक्ष प्रचण्डबीच विगत चार महिनादेखि पटक पटक एक्लाएक्लै वार्ता भए पनि पार्टी एकता सकारात्मक तर्फ नगइरहेको अवस्थामा अध्यक्ष प्रचण्डको त्यस्तो अभिव्यक्ति आएको थियो । माघ २७ गते चितवनको एक कार्यक्रममा उहाँले ‘म अहिले जुन किसिमले हिँडेको छु, यसबाट देश र जनतालाई फाइदा पुग्ने लागेन भने म फड्को मार्न सक्छु’ भन्नुभएको थियो । 

अध्यक्ष प्रचण्डको यस्तो भनाइ आएपछि एकताको विषयमा विभिन्न अड्कलबाजी तथा आशङ्काहरू सुरु भएको थियो र त्यसले गर्दा एमालेप्रति पनि दबाब परेको थियो । सोही दबाबका कारण सोमबार अध्यक्षद्वयबीच भएको वार्ताले सकारात्मक मोड लिएको हो । चितवनबाट अध्यक्ष प्रचण्डले त्यस्तो अभिव्यक्ति दिएपछि एमालेका अध्यक्ष ओलीले आइतबार माधवकुमार नेपाल, झलनाथ खनाल, वामदेव गौतमलगायत नेतासँग छलफल गर्नुभएको थियो ।
सोही छलफलको आधारमा सोमबार प्रचण्डसँग भएको वार्ता सकारात्मकतर्फ गएको नेताहरूले बताउनुभएको छ । यसअघि माओवादी केन्द्रले पार्टीको अध्यक्ष र प्रधानमन्त्रीमध्ये कुनै एउटाको अडानमा थियो भने एमाले दुइटै आफैसँग राख्ने अडानमा थियो । तर, सोमबार भएको वार्तामा एमाले लचिलो भएको नेताहरूले जानकारी गराउनुभएको छ ।
माओवादी केन्द्रका नेता नारायणकाजी श्रेष्ठले दुई अध्यक्षबीच भएको वार्ता सकारात्मक मोडमा पुगेको छ, सरकार गठनअघि यसले एउटा रूप लिने जानकारी बताउनुभयो । के कुरामा सहमति भयो भन्न न चाहनु भएका नेता श्रेष्ठले अरु दिनको तुलनामा वार्ता निकै सकारात्मक भएको जनाकारी गराउनुभयो ।
एमालेका सचिव प्रदीप ज्ञवालीले पनि अरु दिनको तुलनामा दुईबीचको वार्ता सकारात्मक भएको बताउनुभयो । उहाँले भन्नुभयो, दुई दलको बीचमा एकता नहुने कुरा अब कसैले शङ्का नगरे हुन्छ, मैले पहिलादेखि नै सकारात्मक थिए तर आज अध्यक्षहरूको बीचमा भएको वार्ताले एउटा फड्को मारेको छ । भोलि एक चरण उहाँहरू बसेर त्यसलाई टुङ्ग्याउनुहुन्छ । उहाँले दुई जनाको बीचमा के ‘मोडालिटी’ मा कुरा मिलेको हो, त्यो बुझ्न पाएको छैन तर अहिलेलाई यति बुझ्नुस् कुरा सकारात्मक भएको छ भन्नुभयो ।
एमाले नेता भीम रावलका अनुसार एमालेका अध्यक्ष केपी शर्मा ओली प्रधानमन्त्री बन्ने निश्चित भएको छ । सरकार गठन अघि नै पार्टी एकताको खाका तयार हुने बताइएको छ । एमालेका अध्यक्ष केपी शर्मा अ‍ोली प्रधानमन्त्री बनेपछि पार्टीको नेतृत्व माओवादी केन्द्रका अध्यक्ष प्रचण्डले गर्ने कुरामा एमाले सकारात्मक रहेको बताइएको छ ।
तर, महाधिवेशन कहिले गराउने, अन्य नेताहरूको पद कसरी व्यवस्थापन गर्ने, कति सदस्यीय कार्यसमिति बनाउने लगायत विषय टुङ्ग्याउने खाका पनि तयार हुने बताइएको छ । अध्यक्षमा कुरा नमिले सरकार तथा पार्टीको नेतृत्व आलोपालो गर्ने विषयमा पनि छलफल भएको हो तर माओवादी केन्द्रका अध्यक्ष प्रचण्डलाई चित्तबुझ्दो पद दिन पार्टी सकारात्मक रहेको एमालेका ती नेताले बताउनुभयो । दुवै जना सहअध्यक्ष रहने र प्रधानमन्त्री आलोपालो हुने विषयमा पनि छलफल भएको स्रोतले जनाएको छ ।
यता, अध्यक्ष तथा प्रधानमन्त्रीमा आलोपालो हुने कुराको खुलासा एमालेका नेता रावलले गर्नुभएको छ । रिपोर्टर्स क्लबले आयोजना गरेको साक्षात्कार कार्यक्रममा उहाँले आलोपालो नेतृत्वमा सरकार तथा पार्टी चलाउने सहमति भएको बताउनुभयो । उहाँले भन्नुभयो, आज भएको प्रमुख नेताद्वय ओली र प्रचण्डबीचको निर्णायक वार्तामा निर्वाचन आयोगले सम्पूर्ण मत परिणाम सार्वजनिक गरेपछि वाम गठबन्धनकै संयुक्त रूपमा सरकार बनाउने सहमति भएको छ । ’
रावलले संयुक्त सरकार सञ्चालनकै अवस्थामा पार्टी एकता प्रक्रियालाई पनि निरन्तरता दिनेबारे दुई जना अध्यक्षबीच छलफल भएको बताउनुभयो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds